Abaı oblysynda jańa oqý jylynda qansha mektep paıdalanýǵa beriledi
SEMEI. KAZINFORM – Abaı oblysynda jańa oqý jylynda «Keleshek mektepteri» ulttyq jobasy aıasynda 600 oryndyq mektep ashylady. Jalpy óńirde ulttyq joba aıasynda 3 000 oqýshyǵa arnalǵan 5 jańa mektep salynýy tıis. Qazirgi tańda josparlanǵan bes mekteptiń ekeýi iske qosylyp qoıǵan.
Al jańa oqý jylynda Semeıdiń Vodnyı kentindegi mektep paıdalanýǵa beriledi. 600 orynǵa arnalǵan bilim ordasy oryn tapshylyǵyn azaıta túspek.
– Bul – oblysta boı kótergen úshinshi jańa úlgidegi mektep. Buǵan deıin Semeı qalasynyń Qaraǵaıly shaǵyn aýdanynda 1 200 oryndyq, Besqaraǵaı aýdanynda 300 oryndyq mektepter ashylǵan. Qazirgi ýaqytta Aıagóz aýdanynda taǵy bir 600 oryndyq mekteptiń qurylysy aıaqtalýǵa jaqyn. Ol 2-toqsanda paıdalanýǵa beriledi dep josparlanyp otyr. Sondaı-aq Semeıdiń Shyǵys kentinde 300 oryndyq jańa mekteptiń qurylysy bıyl bastaldy, - dep jaýap berdi Abaı oblystyq Bilim basqarmasynan Kazinform tilshisiniń saýalhatyna.
Jańa úlgidegi mektepter oqýshylardyń jas ereksheligine saı jobalanyp, bastaýysh jáne joǵary synyp oqýshylaryna arnalǵan bólek bloktarmen qamtylady. Barlyq ǵımarat zamanaýı tehnıka, yńǵaıly jıhazben jabdyqtalyp, qaýipsizdik pen ınklıýzııa talaptary tolyq eskerilgen.
– Semeıdegi Vodnyı kentindegi úsh qabatty jańa mektepte 28 oqý kabıneti qarastyrylǵan. Onyń ishinde fızıka, hımııa, bıologııa, robototehnıka, grafıka jáne modeldeý, aǵash jáne metall óńdeý, kýlınarııa men tigin bólmeleri bolady. Sondaı-aq akt zaly, ashana, 7 zerthana, kitaphana jáne oqý zaly bar. Mektep ınteraktıvti panel, noýtbýk, statsıonarlyq kompıýter, prınterlermen qamtamasyz etiledi. Muǵalimder men oqýshylarǵa arnalǵan kovorkıng aımaqtary da qarastyrylǵan, - delingen habarlamada.
Qaýipsizdik júıesinde beınebaqylaý kameralary, týrnıketter, apattyq shyǵý esigi jáne ınklıýzıvti orta úshin lıft, pandýs, taktıldi jolaq, arnaıy sanıtarlyq toraptar bar.
Eske salsaq, osyǵan deıin Shyǵys Qazaqstanda jańa oqý jylynda qansha mektep ashylatynyn jazǵanbyz.