Abaı oblysynda jańa Konstıtýtsııanyń resmı basylymyn tabystaý rásimi ótti
SEMEI. KAZINFORM — Búgin Abaı oblysynda búkilhalyqtyq referendým arqyly qabyldanǵan Qazaqstan Respýblıkasy Konstıtýtsııasynyń kúshine enýine oraı jańa Ata zańnyń resmı basylymyn tabystaý rásimi ótkizildi, dep habarlaıdy oblys ákimdiginiń baspasóz qyzmeti.
Jıynǵa oblys ákimi Berik Ýálı, oblystyq máslıhat tóraǵasy Shalqar Baıbekov, oblystyq qoǵamdyq keńes tóraǵasy Meıramhat Aınabekov, quqyq qorǵaý organdarynyń, óńirlik departamentterdiń jetekshileri, basqarma basshylary, qoǵamdyq keńes músheleri qatysty.
Aımaq basshysy óz sózinde jańa Konstıtýtsııanyń el damýyndaǵy tarıhı mańyzyna toqtaldy.
— Búginnen bastap búkilhalyqtyq referendým arqyly qabyldanǵan jańa Konstıtýtsııa óz kúshine endi. Prezıdentimiz Qasym-Jomart Kemeluly Toqaev atap ótkendeı, Konstıtýtsııa — el úshin tek quqyqtyq qujat qana emes, qoǵamdy biriktiretin basty qundylyq. Jańa Konstıtýtsııa elimizdiń jańarý baǵytyn aıqyndap, memlekettik basqarý júıesin jetildirýge, azamattardyń memleketti basqarý isine qatysý múmkindigin keńeıtýge jáne óńirlerdiń ornyqty damýyna jańa serpin beredi. Jańa Konstıtýtsııany qabyldaý — barsha halqymyzdyń ortaq tańdaýy ári ortaq jaýapkershiligi. Osy mańyzdy tarıhı úderiske árqaısyńyz óz úlesterińizdi qostyńyzdar. Azamattyq ustanymdaryńyz ben el bolashaǵyna degen janashyrlyqtaryńyz úshin barshańyzǵa shynaıy rızashylyǵymdy bildiremin, — dedi Berik Ýálı.
Qazaqstan Respýblıkasy Konstıtýtsııasyn túsindirý jónindegi is-sharalar josparyna sáıkes memlekettik jáne orys tilderinde Konstıtýtsııanyń 25 myń danasy basylyp shyǵarylyp, memlekettik organdarǵa jetkiziledi. Onyń 1146 danasy Abaı oblysyna bólinip, aýdandarǵa, bilim berý uıymdaryna, kitaphanalarǵa jáne kásipodaqtarǵa taratyldy.
Saltanatty rásimde Memleket basshysynyń arnaıy quttyqtaýymen joldanǵan jańa Konstıtýtsııanyń resmı basylymy oblystyq máslıhat tóraǵasy Shalqar Baıbekov pen oblystyq qoǵamdyq keńestiń tóraǵasy Meıramhat Aınabekovke saltanatty túrde tabystaldy.
