Abaı oblysynda jańa Konstıtýtsııadan keıingi alǵashqy aýdan ákimi taǵaıyndaldy
SEMEI. KAZINFORM – Abaı oblysynyń ákimi Berik Ýálı Borodýlıha aýdanynyń aktıvine aýdannyń jańa ákimin tanystyrdy.
Jańa Konstıtýtsııanyń qabyldanýyna baılanysty «Qazaqstan Respýblıkasyndaǵy saılaý týraly» Konstıtýtsııalyq zańyna tıisti ózgerister engizildi. Atalǵan ózgeristerge sáıkes oblystyq mańyzy bar qalalar men aýdandar ákimderin saılaý ınstıtýty joıyldy. Qazirgi ýaqytta oblystyq mańyzy bar qalalar men aýdandardyń ákimderin Qazaqstan Respýblıkasynyń zańnamasynda belgilengen tártippen oblys ákimderi tıisti máslıhattardyń kelisimimen taǵaıyndaıdy.
«Qazaqstan Respýblıkasynyń memlekettik qyzmeti týraly» zańynyń 25 babyna sáıkes QR Prezıdent Ákimshiliginiń, Borodýlıha aýdany máslıhat depýtattarynyń kelisimimen jáne oblys ákiminiń ókimimen Borodýlıha aýdanynyń ákimi laýazymyna Talǵat Muratov taǵaıyndaldy.
Aıta keteıik, bul — jańa Konstıtýtsııa qabyldanǵannan keıingi Abaı oblysyndaǵy alǵashqy aýdan ákiminiń taǵaıyndaýy.
— Talǵat Batyruly — memlekettik qyzmettegi tájirıbesi mol, bilikti basshy. Borodýlıha aýdany — oblysymyzdyń mańyzdy strategııalyq aımaqtarynyń biri. Agrarlyq ekonomıkasy, orman sharýashylyǵy, taý-ken óndirisi salalaryndaǵy áleýeti joǵary óńir. Munymen qosa aýdan shekeralyq aımaqta ornalasqandyqtan onyń áleýmettik-ekonomıkalyq damýy bizdiń basty nazarymyzda. Biz óńir ekonomıkasyn nyǵaıtyp, halyqtyń turmys sapasyn jaqsartý baǵytynda naqty jumys jasaýymyz qajet. Sondyqtan artylǵan senimdi aqtap, Borodýlıha aýdanynyń jurtshylyǵymen birlese otyryp, osy aýdannyń odan ári damyp, gúldenýine bar kúsh-jigerin salyp, aıanbaı qyzmet etedi dep senemin, — dedi Berik Ýálı.
Talǵat Batyruly Muratov Almaty oblysynda dúnıege kelgen. Eńbek jolyn bıznes qurylymdarda bastady. Ár jyldary Besqaraǵaı aýdanynyń qurylys, sáýlet jáne qala qurylysy bóliminiń bas mamany, Jarma aýdanynyń sáýlet, qala qurylysy jáne qurylys bóliminiń basshysy, Jarma aýdany ákiminiń orynbasary, Besqaraǵaı aýdany jáne Semeı qalasynyń ákimi, oblys ákiminiń keńesshisi qyzmetin atqardy. 2026 jyldyń aqpanynan bastap osy kúnge deıin Borodýlıha aýdany ákiminiń orynbasary boldy.
Aıta ketelik keshe Túrkistan ákiminiń orynbasary taǵaıyndalǵan edi.
