Abaı oblysynda jalǵan polıtseıler er adamnyń 925 myń teńgesin sheship alǵan
JARMA. KAZINFORM – Abaı oblysynda tártip saqshylary jalǵan polıtseılerdi ustady.
ІІM málimetinshe, ustalǵandar er adamdy aldap, onyń jeke derekterin ıemdenip, sodan keıin onyń shotynan 925 myń teńge sheship alǵan. Jarma aýdanynyń turǵynyn belgisiz adamdar toqtatyp, olar tártip saqshylary bolyp tanysyp, odan jeke basyn kýálandyratyn qujattardy usynýyn suraǵan.
Jábirlenýshiniń qujattary men bıometrııalyq derekterin sýretke túsirgennen keıin kúdiktiler ketip qalǵan. Er adamnyń shotynan aqsha alynǵannan keıin, ol jalǵan polıtseılerge tap bolǵanyn túsinip, «102» arnasyna júgindi. Abaı oblysy Jarma aýdanynyń jedel ýákilderi kúdiktilerdiń izine jyldam túsip, olardy ustady.
Belgili bolǵandaı, alaıaqtyqpen BQO-nyń úsh turǵyny aınalysqan. Qazirgi ýaqytta jastar qamaýǵa alyndy. Tergeý júrgizilip jatyr. Olardyń uqsas qylmystarǵa qatysýy anyqtalyp jatyr.
