Abaı oblysynda zańsyz ornatylǵan jol belgileri alynyp tastaldy

ASTANA. KAZINFORM —  Abaı oblysynda kásipkerlerdiń quqyqtaryn shektegen zańsyz ornatylǵan jol belgileri alynyp tastaldy. 

Kásipkerlerdiń quqyqtaryn qorǵaý jáne zańdylyqtyń saqtalýyn qadaǵalaý sheńberinde Borodýlıha aýdanynyń prokýratýrasy «KH Qyzyl partızan» JShS-niń kásipkerlik qyzmetin negizsiz shekteý faktisin anyqtady.

Júrgizilgen tekserý barysynda Novoshýlba aýyldyq okrýginiń ákimi Qazaqstan Respýblıkasynyń «Jol júrisi týraly» zańynyń talaptaryn buza otyryp jáne jol qozǵalysy qaýipsizdigin qamtamasyz etý jónindegi ýákiletti organnyń aýmaqtyq bólimshesiniń ustanymyna qarama-qaıshy túrde Novaıa Shýlba aýylyndaǵy Krasnopartızanskaıa kóshesine 3.4 «Júk kólikteriniń qozǵalysyna tyıym salynady» degen jol belgilerin ornatý týraly sheshim qabyldaǵany anyqtaldy.

Atalǵan sheshim ınvestordyń, ózge de kásipkerler men aýyl turǵyndarynyń múddelerin eskermeı qabyldanǵan. Bul jol aýyl sharýashylyǵy ónimderin, janar-jaǵarmaı men basqa da júkterdi tasymaldaý úshin qoldanylady. Sonymen qatar, Krasnopartızanskaıa kóshesi aýdandyq mańyzy bar avtojoldarmen baılanystyratyn jalǵyz jol bóligi bolyp tabylady jáne balamaly baǵyty joq.

Aýdan prokýratýrasynyń narazylyǵyn qaraý nátıjesinde bul jol belgileri zańsyz ornatylǵan dep tanylyp, alynyp tastaldy. Investordyń, kásipkerlerdiń jáne aýyl turǵyndarynyń buzylǵan quqyqtary qalpyna keltirildi.

Aıta ketelik Almaty oblysynyń Esik kólinde demalýshylardan 2 ret zańsyz tólem alynǵan.