Abaı oblysynda zańsyz kesilgen aǵashtyń shyǵynyn esepteý tártibi kúsheıdi
ASTANA. KAZINFORM — Abaı oblysynda Mamandandyrylǵan tabıǵat qorǵaý prokýratýrasy eldi mekenderde aǵashtar men butalardy zańsyz kesý saldarynan keltirilgen zııandy anyqtaý kezinde quqyq buzýshylyqtardy anyqtady. Bul týraly óńirlik prokýratýra málim etti.
Anyqtalǵandaı, oblystyń turǵyn úı-kommýnaldyq sharýashylyq organdary esepteýdi orman qorynyń eskirgen stavkalary boıynsha júrgizgen, bul ótemaqy somasynyń tómen kórsetilýine ákelgen.
Prokýratýranyń aralasýynan keıin esepteý ádistemesi qaıta qaraldy. Buryn zııan mólsheri aǵash kólemine qaraı eseptelse, qazirgi ýaqytta esepteý kezinde aǵashtyń túri men jasy eskeriledi. Nátıjesinde jasyl jelekterdi zańsyz joıý úshin belgilengen stavkalar edáýir ulǵaıtyldy.
Prokýrorlyq yqpal etý aktisi boıynsha jasyl jelekterdi otyrǵyzý, kútip-ustaý jáne qorǵaý qaǵıdalary qoldanystaǵy zańnamaǵa sáıkestendirildi, al zııandy esepteý jańartylǵan stavkalar boıynsha júrgizilýde. Abaı oblysynyń prokýratýrasy azamattardy zań talaptaryn saqtaýǵa jáne jasyl jelekterge uqypty qaraýǵa shaqyrady.
Aıta keteıik, buǵan deıin Abaı oblysynda prokýratýra bızneske qatysty 60 zańsyz tekserýdi toqtatqan bolatyn.
