Abaı oblysynda zańsyz balyq aýlaǵandarǵa tosqaýyl qoıý maqsatynda reıdter júrgizilýde

Abaı oblysynda brakonerliktiń jolyn kesý maqsatynda turaqty reıd, patrýldeý jumystary júrgizilýde. Kezekti reıd kezinde zańsyz balyq aýlaǵandar ustaldy, dep habarlaıdy Kazinform.

Abaı oblysynyń Tabıǵı resýrstar jáne tabıǵatty paıdalanýdy retteý basqarmasyna qarasty Orman jáne ańshylyq sharýashylyǵynyń jedel jasaǵy Aqsýat aýdanyndaǵy Zaısan kóliniń aýmaǵynda reıd júrgizdi.

«Sonyń nátıjesinde kóldiń tyıym salynǵan aýmaǵynda tıisti qujattarsyz qoldanýǵa ruqsat etilmegen tormen zańsyz balyq aýlaǵan Óskemen qalasynyń turǵyny ustaldy. Atalǵan faktige baılanysty QR Qylmystyq Kodeksiniń 335-baby 1-bóliginiń 1-tarmaǵymen (Balyq resýrstaryn, basqa da sý janýarlaryn nemese ósimdikterin zańsyz alý) qylmystyq is qozǵaldy. Zańsyz balyq aýlaǵandardyń saldarynan memleketke keltirilgen shyǵyn mólsheri 577 478 teńgeni qurady. Qylmystyq is materıaldary sot organdaryna jiberildi», - dep habarlady oblys ákimdiginen.

Brakoner úsh jylǵa deıingi merzimge bas bostandyǵynan aıyrylýy múmkin.

Balyq jáne ań aýlaý erejelerin buzý faktilerin anyqtaý maqsatynda óńirdiń barlyq aýmaǵynda reıdter turaqty túrde ótkizilýde.