Abaı oblysynda iz-túzsiz joǵalǵan bala qudyqtan tabyldy

ASTANA. KAZINFORM — Abaı oblysynda ýchaskelik polıtseı kameralardyń kómegimen joǵalǵan 8 jasar balany taýyp aldy, dep habarlaıdy oblystyq PD baspasóz qyzmeti.

Abaı oblysynyń Chekoman aýylynda iz-túzsiz joǵalǵan balany izdeý jumystary sátti aıaqtaldy. Raııan esimdi 8 jasar balanyń joǵalǵany týraly habarlama polıtsııaǵa sol kúni kelip tústi. Kýágerler balany sońǵy ret saǵat 16:30 shamasynda kórgen.

Birneshe mınýttyń ishinde jergilikti turǵyndar balany izdeýge shyqty. Polıtsııa qyzmetkerleri men jergilikti atqarýshy bılik ókilderi dereý izdeýge qosyldy.

Sheshýshi róldi beınebaqylaý kameralary atqardy: ýchaskelik polıtsııa ınspektory Almas Besenbekov pen aýyldyq okrýgtiń ákimi Nurken Jarlıkenov jazbalardy qarap, balanyń júrip ótýi múmkin baǵytyn jáne naqty ornalasqan jerin anyqtady.

Bala qudyqtyń ishinen tabyldy. Ol jerde birneshe saǵat bolǵan. Aldyn ala málimet boıynsha, bala qudyqqa ádeıi emes, kezdeısoq qulap ketken. Beton plıtanyń bir sheti opyrylyp, astynda oıyq paıda bolǵan. Bala sol oıyqty baıqamaı, ishine túsip ketken.

Bala aman-esen qutqaryldy, medıtsınalyq kómektiń qajeti bolmady. Balanyń anasy izdeýge qatysqan barlyq adamǵa jáne kómek kórsetkenderge alǵysyn bildirdi.

— Beınebaqylaý júıeleri qoǵamdyq qaýipsizdikti qamtamasyz etýde mańyzdy ról atqarady: osy jaǵdaıda kameralar jedel áreket etýge jáne shyn máninde balanyń ómirin qutqarýǵa kómektesti, — dep atap ótti Abaı oblysy polıtsııa departamentiniń bastyǵy Eldar Danııarov.

Abaı oblysy Polıtsııa departamenti turǵyndarǵa ásirese qys mezgilinde balalarǵa erekshe kóńil bólý qajettigin eske salyp, qaýipti ýchaskeler men ashyq ınjenerlik qurylystar týraly aqparatty ýaqytynda habarlaýdy suraıdy.

Budan buryn Shymkentte úıinen belgisiz baǵytqa shyǵyp ketken bozbala qaıta oralmaǵanyn jazǵan edik.