Abaı oblysynda iz-túzsiz joǵalǵan bala alty saǵat boıy qudyqta bolǵan
ASTANA. KAZINFORM — Abaı oblysy Chekoman aýylynda beınebaqylaý júıeleri ashyq qudyqqa abaısyzda qulap ketken 8 jastaǵy balanyń naqty ornalasqan jerin jedel anyqtaýǵa kómektesti. Bala shamamen alty saǵat boıy qudyqta bolyp, aman-esen tabyldy.
Aldyn ala málimetterge sáıkes, saǵat 14:00 shamasynda 8 jastaǵy Raıan úıinen oınaýǵa shyǵyp, týystaryna barǵan, biraq ol jaqta uzaq bolmaǵan. Keıinirek bala dalada qarmen oınap júrgen, qolynda shanasy bolǵan. Bir sátte ol kútpegen jerden tómen qulap, qudyqtyń ishine túsken.
Ata-anasy balany shamamen saǵat 18:00–de izdeı bastady. Olar tynysh aýylda balanyń dostarynyń nemese týystarynyń úıinde bolýy múmkin dep boljaǵan. Saǵat 20:00 shamasynda balanyń joǵalǵany týraly aqparat polıtsııanyń ýchaskelik ınspektory Almas Beısenbekovke túsken. Ol ýaqytqa deıin aýyl turǵyndary men týystary balany óz betterinshe izdep, aýyl kóshelerin aralap júrgen.
— Habar alǵan soń ýchaskelik ınspektor jedel túrde beınebaqylaý kameralary ornalasqan ákimdik ǵımaratyna barǵan. Jazbalardy qarap shyǵýǵa shamamen 10 mınýt ketken, sol arqyly balanyń qudyqqa qulap ketkeni anyqtalǵan. Osydan keıin polıtsııa qyzmetkeri dereý oqıǵa ornyna baryp, birneshe mınýttyń ishinde balany jer betine shyǵaryp alǵan, — delingen vedomstvo habarlamasynda.
Balaǵa medıtsınalyq kómek qajet bolmaǵan. Ýchaskelik ınspektormen áńgime barysynda Raıan eń kóp alańdatqan nárse — endi mektepke qalaı baratyny bolǵanyn aıtqan. Balanyń abdyrap qalmaı, ózine nazar aýdartýǵa tyrysqany da atap ótiledi: ol ótip bara jatqan adamdar baıqap qalar degen úmitpen qolǵaptaryn joǵaryǵa laqtyryp jibergen.
— Qolda bar aqparatqa sáıkes, buǵan deıin aýylda sý qubyry jelisin tartý jumystary júrgizilgen. Qurylys bólimi TOO «QazConstruction» merdiger uıymyn memlekettik satyp alýlardyń josyqsyz qatysýshysy dep taný jáne aıyppul óndirip alý týraly sotqa talap aryz bergeni habarlandy. Qazirgi ýaqytta Ákimshilik polıtsııa basqarmasy merdiger uıymnyń qyzmetine qatysty mán-jaılardy naqtylap jatyr, — delingen oblystyq PD taratqan aqparatta.
Polıtsııa turǵyndardy balalardyń joǵalyp ketý faktileri týraly dereý quqyq qorǵaý organdaryna habarlaýǵa shaqyrady.
Budan buryn Abaı oblysynda iz-túzsiz joǵalǵan bala qudyqtan tabylǵanyn jazǵanbyz.