Abaı oblysynda úsh jyldan astam ýaqyt buryn jasalǵan kisi óltirý qylmysy ashyldy
ASTANA. KAZINFORM- Іshki ister mınıstrliginiń qyzmetkerleri Abaı oblysynda úsh jyldan astam ýaqyt buryn jasalǵan kisi óltirý qylmysyn ashty. Kúdikti kinásin moıyndap, qylmystyń mán-jaıyn baıandaǵan jáne máıit jasyrylǵan jerdi kórsetken.
Qazirgi ýaqytta aıyptaý aktisimen birge qylmystyq is sotqa joldandy, dep habarlaıdy Polisia.kz.
2023 jylǵy qyrkúıekte polıtsııaǵa áıel adam habarlasyp, joǵalǵan kúıeýin izdestirýge kómektesýdi suraǵan. Onyń aıtýynsha, jubaıy jumys isteý úshin basqa jaqqa ketip, sodan beri baılanysqa shyqpaǵan.
Jedel-izdestirý is-sharalary júrgizilgenimen, sol kezde er adamnyń júrgen jerin anyqtaý múmkin bolmady. Soǵan qaramastan, habar-osharsyz ketken azamatty izdeý jumystary toqtaǵan joq. Polıtseıler oqıǵanyń túrli nusqasyn muqııat tekserip, er adamnyń joǵalýyna qatysy bolýy múmkin adamdardy anyqtaý baǵytynda júıeli jumys júrgizdi.
Jedel-izdestirý is-sharalary barysynda tártip saqshylarynyń nazaryna osy kisi óltirý qylmysyn jasaǵannan keıin basqa qylmys boıynsha qylmystyq jaýapkershilikke tartylyp, keıin bas bostandyǵynan aıyrý oryndarynda jazasyn ótep jatqan azamat ilikti.
-Onyń er adamnyń joǵalýyna qatystylyǵyn tekserý úshin qosymsha keshendi jumystar uıymdastyryldy. Nátıjesinde kúdikti kinásin moıyndap, qylmystyń mán-jaıyn egjeı-tegjeıli baıandady jáne máıit jasyrylǵan jerdi kórsetti,-delingen habarlamada.
Іshki ister mınıstrligi bul baǵyttaǵy jumysty odan ári jalǵastyratynyn málimdedi. Vedomstvonyń habarlaýynsha, árbir qylmysqa quqyqtyq baǵa berilip, kináliler zań aldynda jaýap berýi tıis. Jazanyń bultartpastyǵy qaǵıdaty ishki ister organdary qyzmetiniń basty basymdyqtarynyń biri bolyp qala beredi.
Osyǵan deıin Abaı oblysynda dropperlikke qatysty 40 qylmystyq is tirkelip, 9 adam sottalǵan bolatyn.