Abaı oblysynda úsh kúnde 1027 júrgizýshi jol erejesin buzǵan
ASTANA. KAZINFORM — Abaı oblysynda jol qaýipsizdigi reıdi kezinde 9 mas júrgizýshi ustaldy, dep habarlaıdy oblystyq Polıtsııa departamentiniń baspasóz qyzmeti.
Abaı oblysynda 10–12 tamyz aralyǵynda ótken «Qaýipsiz jol» jedel-profılaktıkalyq is-sharasy qorytyndylandy.
Jol qozǵalysy qaýipsizdigin qamtamasyz etý, jol-kólik oqıǵalarynyń aldyn alý jáne júrgizýshilerdiń tártibin kúsheıtýge baǵyttalǵan reıd barysynda polıtsııa qyzmetkerleri 1027 quqyq buzýshylyqtyń jolyn kesti.
Quqyq buzýshylyqtardyń basym bóligi kólik quralyn basqarý kezinde qaýipsizdik talaptaryn saqtamaýǵa qatysty boldy.
Atap aıtqanda:
358 — jolaýshylar men júkterdi tasymaldaý, qaýipsizdik beldigin taqpaý jáne motoshlem paıdalaný talaptaryn buzý;
204 — tehnıkalyq reglament talaptaryna saı kelmeıtin kólik quralyn basqarý;
167 — kólik júrgizý kezinde telefon nemese radıostantsııa paıdalaný;
86 — mindetti tehnıkalyq baıqaýdan ótpegen kólikti basqarý;
43 — kólik basqarý quqyǵy joq adamnyń rólge otyrýy;
35 — memlekettik nómirlik belgisiz nemese belgilengen tártippen tirkelmegen kólikti basqarý;
26 — jolaýshylar, bagaj jáne júkterdi tasymaldaý qaǵıdalaryn buzý;
26 — balalardy ustap turatyn arnaıy qurylǵysyz kólik basqarý;
18 — tıisti ruqsatsyz kólikti qaıta jabdyqtaý;
11 — kólik basqarý quqyǵynan aıyrylǵan adamnyń rólge otyrýy;
10 — júrgizýshilerdiń eńbek jáne demalys rejıminiń buzylýy;
9 — mas kúıinde kólik basqarý;
9 — qarsy baǵytqa shyǵý;
4 — jolaýshylardy zańsyz tasymaldaý faktileri.
Polıtsııanyń aıtýynsha, reıdtik is-sharanyń negizgi maqsaty — quqyq buzýshylyqtardy tirkeý ǵana emes, joldaǵy qaýipti jaǵdaılardyń aldyn alý.
— Jol qaýipsizdigi — ortaq jaýapkershilik. Árbir anyqtalǵan quqyq buzýshylyqtyń artynda adam ómiri men densaýlyǵyna tónýi múmkin qaýip bar. Sondyqtan júrgizýshilerdi jol erejesin saqtaýǵa, jyldamdyq rejımin buzbaýǵa jáne kólik basqarý kezinde barynsha muqııat bolýǵa shaqyramyz, — dedi polıtsııa qyzmetkerleri.
Buǵan deıin Abaı oblysynda bir kúnde 306 júrgizýshi jol erejesin buzǵanyn jazdyq.
