Abaı oblysynda úsh balasyn mektepke bermegen ata-ana jaýapqa tartyldy

SEMEI. KAZINFORM – Semeı qalasynyń prokýratýrasy «Otbasynyń tsıfrlyq kartasy» jobasyn iske asyrý aıasynda tórt balanyń mindetti orta bilimmen qamtylmaǵanyn anyqtady.

Óreskel mysaldardyń biri destrýktıvti dinı kózqarasty ustanǵan otbasyǵa qatysty boldy. Bul otbasynda 8 ben 13 jas aralyǵyndaǵy úsh bala tárbıelenip, ata-anasynyń nanym-senimine baılanysty mektepke barý múmkindiginen aıyrylyp, erte jastan bilim berý júıesinen tys qalǵan.

Prokýratýranyń bastamasymen ýákiletti organdar ár balanyń bilim deńgeıin baǵalap, keıin olardy mektepke qabyldady. Anasy ákimshilik jaýapkershilikke tartyldy. Al ýákiletti organdardyń laýazymdy tulǵalaryna tártiptik jaza qoldanyldy.

Taǵy bir jaǵdaıda psıhıkalyq damýy tejelgen 9 jastaǵy balanyń quqyǵy buzylǵany belgili boldy. Balaǵa múgedektik berilmegendikten, ol mekteptik te, arnaıy da bilim ala almaǵan.

Prokýratýranyń aralasýynan keıin bala psıhıkalyq densaýlyq ortalyǵyna statsıonarlyq tekserýge jiberilip, resmı qorytyndy alýǵa jáne ári qaraı oqý baǵytyn aıqyndaýǵa múmkindik jasaldy. Onyń zańdy ókili de ákimshilik jaýapkershilikke tartyldy.

Semeı qalasynyń prokýratýrasy kámeletke tolmaǵandardyń quqyqtaryn qorǵaý jáne olardyń bilim alý quqyǵyn qamtamasyz etý boıynsha belsendi ári maqsatty jumysyn jalǵastyryp jatyr.

Aıta keteıik, «Baǵanashyl» balalar úıiniń tárbıelenýshileri ýaqytsha basqa mekemege kóshiriletin boldy.