Abaı oblysynda týrızm men mádenıetti ushtastyrǵan festıval ótip jatyr
ASTANA. KAZINFORM — 20 maýsym men 1 tamyz aralyǵynda Abaı oblysynda alǵash ret «Alakól alaýlary – 2026» mádenı-týrıstik festıvali ótip jatyr. Bul – jazǵy týrıstik maýsymdaǵy eń aýqymdy mádenı is-sharalardyń biri. Bul týraly Týrızm jáne sport mınıstrligi málim etti.
Festıval mádenıet pen týrızm salalaryn toǵystyryp, óńir turǵyndary men qonaqtaryna mazmundy ári tartymdy baǵdarlama usynady. Baǵdarlama aıasynda tanymal otandyq ónerpazdardyń kontsertteri, oblystyń qala-aýdandarynyń shyǵarmashylyq ujymdarynyń óner kórsetýi, sondaı-aq memlekettik jáne ulttyq merekelerge arnalǵan mádenı is-sharalar uıymdastyrylyp otyr.
Festıval baǵdarlamalary apta saıyn ótkizilip, ár aýdan Abaı óńiriniń tarıhyn, salt-dástúrin jáne shyǵarmashylyq áleýetin tanystyratyn arnaıy mádenı baǵdarlamasyn usynady.
Festıval ashylǵan kúnnen bastap kórermenderdiń erekshe qyzyǵýshylyǵyna ıe boldy. Saltanatty ashylý rásimine shamamen 7,5 myń adam qatysty. Taldyqorǵan qalasynyń mádenıet kúnderi aıasyndaǵy is-sharalarǵa 4 myńǵa jýyq kórermen jınalsa, Semeı qalasynyń mádenıet kúnderi aıasyndaǵy kontserttik baǵdarlamany 8,5 myńǵa jýyq adam tamashalady.
Mádenı jobalarmen qatar, Alakól jaǵalaýyndaǵy týrıstik ınfraqurylymdy jańǵyrtý jumystary da qarqyndy júrgizilip jatyr.
- Zamanaýı qutqarý stantsııasynyń qurylysy aıaqtalyp, táýlik boıy dárigerler, polıtsııa qyzmetkerleri men qutqarýshylar kezekshilik atqaratyn keshendi qaýipsizdik pýnkti paıdalanýǵa berildi.
- Jaǵajaı aýmaǵyna qaldyqtardy bólek jınaýǵa arnalǵan konteınerler, dýsh kabınalary, kıim aýystyratyn oryndar, sanıtarlyq toraptar, qutqarý munaralary, aqparattyq pýnktter jáne beınebaqylaý kameralary ornatyldy.
- Jańa avtomobıl joldary salynyp, elektr jelileri tartyldy. Sonymen qatar jaǵalaýdy nyǵaıtý, ınjenerlik ınfraqurylymdy damytý jáne kommýnaldyq júıelerdi jańǵyrtý baǵytyndaǵy jobalar kezeń-kezeńimen júzege asyrylmaq.
«Alakól alaýlary – 2026» festıvali 1 tamyzǵa deıin jalǵasady. Osy ýaqyt ishinde óńir turǵyndary men qonaqtary apta saıyn ótetin mádenı is-sharalardy tamashalap, mazmundy demalys ótkizýge múmkindik alady. Festıval Abaı oblysynda ishki týrızmdi damytýǵa, óńirdiń mádenı áleýetin keńinen nasıhattaýǵa jáne óńirdiń týrıstik tartymdylyǵyn arttyrýǵa óz úlesin qospaq.
Aıta keteıik, 25 shildede Jetisý oblysyndaǵy Alakól jaǵalaýynda «Alakól tolqyny» festıvali uıymdastyrylady.
