Abaı oblysynda túngi reıd kezinde 409 jasóspirim polıtsııaǵa jetkizildi
ASTANA. KAZINFORM — Abaı oblysynda túngi reıd kezinde 16 jasóspirim beıimdeý ortalyǵyna ornalastyryldy, dep habarlaıdy oblystyq Polıtsııa departamentiniń baspasóz qyzmeti.
Departamenttiń baspasóz qyzmetiniń málimetinshe, túngi saǵat 23:00–den keıin qala men eldi mekender birtindep tynyshtalady. Alaıda dál osy ýaqytta polıtsııa qyzmetkerleriniń jumysy jalǵasady. Sebebi balanyń túngi ýaqytta qaıda júrgeni, kimmen birge ekeni jáne qaýipsiz jerde bolýy — nazardan tys qalmaýy tıis.
Abaı oblysynda «Nazar aýdaryńyz, balalar!» jedel-profılaktıkalyq is-sharasy aıasynda polıtsııa qyzmetkerleri túngi reıdter uıymdastyryp, kámeletke tolmaǵandardyń qaýipsizdigi men quqyqtyq tártibin qamtamasyz etýge baǵyttalǵan keshendi profılaktıkalyq jumystar júrgizilip jatyr.
Reıdtik is-sharalar barysynda tártip saqshylary kóshelerdi, qoǵamdyq oryndardy jáne jasóspirimder jıi jınalatyn aýmaqtardy aralap, túngi ýaqytta zańdy ókilderiniń erip júrýinsiz júrgen balalardy anyqtady.
Sonymen qatar jasóspirimder arasynda quqyq buzýshylyqtyń aldyn alýǵa, olardyń qaýipsizdigin qamtamasyz etýge jáne ata-analardyń jaýapkershiligin arttyrýǵa basymdyq berildi.
— Shara barysynda 409 kámeletke tolmaǵan bala ishki ister organdaryna jetkizildi. Olardyń jaǵdaıy zerdelenip, árbir fakti boıynsha tıisti profılaktıkalyq jáne quqyqtyq sharalar qabyldandy. 16 jasóspirim qaraýsyzdyq pen panasyzdyq faktileri boıynsha Balalardy beıimdeý ortalyǵyna ornalastyryldy. Túngi reıdter nátıjesinde barlyǵy 446 ákimshilik quqyq buzýshylyqtyń joly kesildi, — deıdi polıtsııa qyzmetkerleri.
Onyń ishinde ata-analar men ózge de zańdy ókilderdiń bala tárbıesine qatysty mindetterin oryndamaýy boıynsha 43 derek anyqtaldy. Eń kóp tirkelgen faktilerdiń biri — kámeletke tolmaǵandardyń túngi ýaqytta zańdy ókilderinsiz turǵynjaıdan tys jerde bolýy. Osy baǵytta 370 jaǵdaı anyqtaldy.
Polıtsııa qyzmetkerleri reıd barysynda jasóspirimdermen profılaktıkalyq áńgimeler ótkizip, túngi ýaqytta kóshede júrýdiń yqtımal qaýipterin túsindirdi. Ata-analarǵa da balalardyń bos ýaqytyn baqylaý, olardyń qaıda júrgeninen habardar bolý jáne zań talaptaryn saqtaý qajettigi eskertildi.
Budan buryn Shymkenttegi dendrosaıabaq mańynda jasóspirimdi pyshaqtap ketkenin jazdyq.
