Abaı oblysynda túnde 900-den astam bala eresekterdiń qaraýynsyz júrgen
ASTANA. KAZINFORM – Abaı oblysynda «Nazar aýdaryńyz, balalar!» jedel-profılaktıkalyq is-sharasy aıasynda polıtsııa qyzmetkerleri 1 myńnan astam ákimshilik quqyq buzýshylyqtyń jolyn kesti, dep habarlaıdy Polisia.kz.
Profılaktıkalyq jumystar barysynda polıtsııa qyzmetkerleri balalardyń qaýipsizdigine qatysty birqatar baǵytta reıdtik jáne túsindirý is-sharalaryn júrgizip jatyr. Barlyǵy 232 reıdtik is-shara ótkizildi. Onyń barysynda qoldanystaǵy zańnama talaptarynyń saqtalýyna baqylaý jasalyp, anyqtalǵan quqyq buzýshylyqtardyń jolyn kesý boıynsha tıisti sharalar qabyldandy.
– Júrgizilgen profılaktıkalyq jumystardyń nátıjesinde barlyǵy 1 134 ákimshilik quqyq buzýshylyqtyń joly kesildi. Sonymen qatar ata-analardyń jáne ózge de zańdy ókilderdiń balalardy tárbıeleý, olardyń qaýipsizdigin qamtamasyz etý jáne minez-qulqyna baqylaý jasaý jónindegi mindetterine erekshe nazar aýdaryldy. Osy baǵytta 164 jaǵdaıda ata-analardyń nemese basqa da zańdy ókilderdiń kámeletke tolmaǵandardy tárbıeleý jónindegi mindetterin oryndamaǵany anyqtaldy, . Balalardyń qaraýsyz jáne panasyz qalýynyń aldyn alý maqsatynda– delingen resmı habarlamada.
Sondaı-aq óńirde profılaktıkalyq esepke alý jáne anyqtaý jumystary da júrgizilip jatyr. Nátıjesinde 67 kámeletke tolmaǵan bala qaraýsyzdyq pen panasyzdyq faktileri boıynsha Kámeletke tolmaǵandardy beıimdeý ortalyǵyna ornalastyrylypty.
– Balalardyń túngi ýaqytta qaýipsizdigin qamtamasyz etý de is-sharanyń mańyzdy baǵyttarynyń biri bolyp otyr. Reıdtik jumystar barysynda 23:00-den 06:00-ge deıin zańdy ókilderiniń erip júrýinsiz turǵynjaıdan tys jerde júrgen 902 kámeletke tolmaǵan anyqtaldy. Sonymen qatar jasóspirimderdiń túngi ýaqytta oıyn-saýyq oryndarynda zańdy ókilderiniń erip júrýinsiz bolýyna jol bermeý maqsatynda baqylaý kúsheıtildi. Nátıjesinde túngi ýaqytta oıyn-saýyq mekemelerinde zańdy ókilderiniń súıemeldeýinsiz júrgen 12 kámeletke tolmaǵan anyqtaldy, – delingen vodomstvo taratqan aqparatta.
Balalardyń joldaǵy qaýipsizdigin qamtamasyz etý tek jol qozǵalysyna qatysýshylardyń tártibine ǵana emes, oqý oryndary mańyndaǵy jol ınfraqurylymynyń jaı-kúıine de tikeleı baılanysty. Osyǵan oraı bilim berý uıymdaryna irgeles aýmaqtardaǵy jol ınfraqurylymyna tekserý júrgizilip, anyqtalǵan kemshilikterdi joıý boıynsha 110 nusqama engizildi.
Polıtsııa qyzmetkerleri ata-analardy balalardyń qaýipsizdigine nemquraıly qaramaýǵa, olardyń qaıda jáne kimmen júrgenin baqylaýǵa, túngi ýaqytta zańdy ókilderiniń qaraýynsyz kóshege jáne oıyn-saýyq oryndaryna jibermeýge shaqyrady.
Aıta keteıik, buǵan deıin Abaı oblysynda túngi reıd kezinde 409 jasóspirim polıtsııaǵa jetkizilgenin jazdyq.
Sondaı-aq Almatyda turatyn jeri joq adamdarǵa reıd júrgizildi.
