Abaı oblysynda tótenshe jaǵdaılarǵa jedel den qoıý úshin 330 tehnıka daıyndaldy
Abaı oblysynda qys aılary kezinde tótenshe jaǵdaılarǵa jedel den qoıý úshin 330 tehnıka daıyndalǵan, dep habarlaıdy Kazinform.
Oblys ákimdiginde tótenshe jaǵdaılardyń aldyn alý jáne joıý jónindegi óńirlik komıssııanyń kezekti otyrysy ótti. Onda qys kezinde bolatyn tótenshe jaǵdaılarǵa daıyndyq jaıy sóz etildi.
«Jyl saıyn qys mezgilinde Abaı oblysy boıynsha tabıǵı jáne tehnogendik sıpattaǵy túrli tótenshe jaǵdaılar bolady. Bul negizinen joldarda kólikterdiń qar qursaýynda qalýy jáne jylýmen jabdyqtaý obektilerindegi apattar. Aımaqtyń avtomobıl joldarynda uzyndyǵy 243,6 km bolatyn 244 qarly ýchaske anyqtaldy», - dep habarlady oblys ákimdiginiń baspasóz qyzmetinen.
Avtojoldarda 30 jylytý pýnkti ornalasqan. Onyń ishinde 21-i respýblıkalyq mańyzy bar joldarda, 9-y oblystyq mańyzy bar joldarda. Aýdandyq mańyzy bar joldarda qosymsha 69 jylytý pýnkti (mektepter, ınternattar, balabaqshalar jáne t.b.) bar.
«Budan basqa, shuǵyl medıtsınalyq kómek kórsetý úshin 3 trassalyq medıtsınalyq-qutqarý pýnkti daıyn tur. Qysqy kezeńdegi tótenshe jaǵdaılarǵa jedel den qoıý úshin Abaı oblysynyń qalalary men aýdandarynda jeke quramnan 947 adam, 330 tehnıka daıyndalǵan», - delingen aqparatta.
Otyrys qorytyndysy boıynsha jaýapty mamandarǵa qysqy kezeńde áleýmettik ınfraqurylym obektileriniń turaqty jumysyn qamtamasyz etý, respýblıkalyq jáne jergilikti mańyzy bar avtomobıl joldaryn qaýipsiz kútip ustaý jóninde birqatar tapsyrma berildi.
