Abaı oblysynda tórt shetel azamaty Qazaqstan azamattyǵyn aldy
ASTANA. KAZINFORM — Abaı oblysynda tórt shetel azamaty Qazaqstan Respýblıkasy Prezıdentiniń 2026 jylǵy 8 maýsymdaǵy № 1308 Jarlyǵyna sáıkes Qazaqstan Respýblıkasynyń azamattyǵyna qabyldandy.
Azamattyq rásimin resimdeý jumystaryn súıemeldeýde Abaı oblysy Polıtsııa departamenti Kóshi-qon qyzmeti basqarmasynyń qyzmetkerleri mańyzdy ról atqardy. Kóshi-qon qyzmetiniń mamandary zań talaptaryna sáıkes quqyqtyq súıemeldeý jumystaryn júrgizip, ótinish berýshilerge keńes berip, barlyq qajetti rásimderdiń uıymdastyrylýyn qamtamasyz etti.
Jańa azamattar buǵan deıin basqa memleketterdiń azamattary bolǵanymen, uzaq jyldar boıy Qazaqstanda turaqty turyp kelgen. Olardyń keıbiri elimizde bes jyldan astam ýaqyt ómir súrse, endi bireýleri jıyrma jyldan astam ýaqyttan beri turyp keledi. Osy ýaqyt ishinde olar qazaqstandyq qoǵamnyń ajyramas bóligine aınalyp, otbasyn quryp, eńbek etip, óńirdiń qoǵamdyq ómirine belsendi túrde qatysyp keledi.
— Qazaqstan biz úshin týǵan úıimizge aınaldy. Munda bizdiń otbasylarymyz turady, balalarymyz ósip keledi, bolashaǵymyzdy osy jerde quryp jatyrmyz. Azamattyq alý — ómirimizdiń jańa paraǵyn ashatyn mańyzdy ári tolǵandyrarlyq oqıǵa, — dep bólisti Qazaqstan Respýblıkasynyń jańa azamattary.
Kóshi-qon qyzmeti qyzmetkerleriniń aıtýynsha, azamattyq máseleleri boıynsha jumys — azamattar men el aýmaǵynda turaqty turatyn adamdardyń konstıtýtsııalyq quqyqtarynyń júzege asyrylýyn qamtamasyz etýge baǵyttalǵan qyzmettiń mańyzdy baǵyttarynyń biri.
Budan buryn sońǵy 8 jylda Qazaqstan azamattyǵynan shyǵýǵa ótinish bergender sany 40 esege jýyq azaıǵanyn jazdyq.
