Abaı oblysynda tórt balanyń ómirin qıǵan jol-kólik oqıǵasy boıynsha sot úkimi shyqty

SEMEI. KAZINFORM Abaı oblysyndaǵy Besterek aýylynda bolǵan tórt balanyń ómirin qıǵan jol-kólik oqıǵasyna qatysty sot protsesi aıaqtaldy.

55 jastaǵy júrgizýshige qatysty Qylmystyq kodekstiń 345-baby 4-bóligi (Jol qozǵalysy erejelerin buzýdyń abaısyzda eki nemese odan da kóp adamnyń ólimine ákep soǵýy) boıynsha sot isi qaraldy.

Sot sheshimimen 9 jylǵa bas bostandyǵynan aıyrylǵan aıyptalýshy óz jazasyn qaýipsizdik deńgeıi tómen túzetý mekemesinde óteıtin boldy. Sonymen qatar ol 7 jyl merzimge kólik basqarý quqyǵynan aıyryldy. Jaza taǵaıyndaý kezinde sot aıyptalýshynyń úkim shyqqanǵa deıin qamaýda bolǵan ýaqytyn da esepke aldy. Qylmystyq zańnama talaptaryna sáıkes, tergeý ızolıatorynda otyrǵan árbir kún jaza óteý merzimine eki kún retinde esepteledi.

Aıyptaý materıaldaryna sáıkes, jol-kólik oqıǵasy kezinde júrgizýshiniń epılepsııa ustamasy ustap, sonyń saldarynan kólik basqarý múmkindiginen aıyrylǵan.

Eske salaıyq, qaıǵyly oqıǵa 19 tamyz kúni Abaı oblysynyń Úrjar aýdanyna qarasty Besterek aýylynda bolǵan. Toyota markaly avtokólikti basqarǵan 55 jastaǵy júrgizýshi joldan shamamen 10 metr qashyqtyqtaǵy úıdiń qaqpasy mańynda oınap júrgen balalardy qaǵyp ketken. Oqıǵa saldarynan eki bala sol jerde kóz jumsa, bir bala medıtsınalyq mekemege bara jatqan jolda qaza boldy. Taǵy úsh bala aýyr jaraqat alyp, aýrýhanaǵa jetkizilgen.

Prezıdenttiń tapsyrmasymen Abaı oblysyna medıtsınalyq kómek kórsetý úshin áskerı ushaq jiberildi. Jaǵdaıy turaqtalǵan soń, zardap shekken eki bala sanıtarlyq avıatsııa arqyly Astana qalasyna jetkizildi.

Qaza bolǵan balalardyń otbasylaryna jerleý rásimderin uıymdastyrýǵa kómek kórsetildi.

Júrgizýshi oqıǵa bolǵan kúni ustalyp, ýaqytsha ustaý ızolıatoryna qamaldy. Medıtsınalyq kýálandyrý onyń jol apaty kezinde mas kúıde bolmaǵanyn kórsetti.

Tergeý barysynda er adamnyń 2013 jyldan beri epılepsııa dıagnozymen esepte turǵany anyqtaldy. Qazirgi ýaqytta onyń kólik júrgizý kýáligin qandaı negizde alǵany tekserilip jatyr.

Zańnamaǵa sáıkes, mundaı dıagnozy bar adamdarǵa kólik basqarýǵa tyıym salynady, sebebi kenetten bolatyn ustamalar aýyr saldarǵa ákelýi múmkin. Osyǵan baılanysty polıtsııa departamenti Úrjar aýdandyq sotyna júrgizýshiniń kólik basqarý quqyǵyn ýaqytsha toqtatý týraly talap joldap, ol qanaǵattandyryldy.

Úrjar aýdanynyń Besterek aýylynda bolǵan jol-kólik oqıǵasynan zardap shekken eki bala qyrkúıek aıynda kúrdeli operatsııalardan keıin úılerine shyǵarylǵan. Alaıda ókinishke qaraı komada jatqan taǵy bir qyz bala qazan aıynyń basynda kóz jumdy.

Osylaısha, atalǵan qaıǵyly oqıǵa saldarynan bir otbasynan úsh bala jáne ekinshi otbasynan eki jasar bala qaza tapty. Barlyq bala bir-birine týys jáne demalys kezinde ata-ájesiniń úıine qonaqqa kelgen.

Eske salsaq, osyǵan deıin Almaty-Óskemen trassasynda avtobýs pen júk kóligi soqtyǵysyp, júrgizýshi qaza bolǵany habarlanǵan.