Abaı oblysynda «tıimdi ınvestıtsııa» usynyp, azamattardy aldaǵan kúdikti anyqtaldy
ASTANA. KAZINFORM – Abaı oblysynda ınvestıtsııa atyn jamylǵan alaıaqtyq faktisi áshkerelendi, dep habarlaıdy Polisia.kz.
Semeı qalasynyń polıtsııa qyzmetkerleri azamattardy «tıimdi ınvestıtsııa» jáne jyldam tabys ýádesimen aldap, olardyń aqshalaı qarajatyn ıemdengen 24 jastaǵy jergilikti turǵyndy anyqtady.
Sotqa deıingi tergep-tekserý barysynda belgili bolǵandaı, 2025 jyldyń qyrkúıek-qarasha aılary aralyǵynda kúdikti ózin senimdi tulǵa retinde tanystyryp, turǵyndardyń senimine kirgen. Ol joǵary tabysqa kepildik beretin tıimdi ınvestıtsııalyq usynystar bar ekenin aıtyp, azamattardy qarjy salýǵa úgittegen. Osylaısha jábirlenýshilerdiń senimin teris paıdalanyp, aldaý jolymen olardyń qarajatyn ıemdengen.
Tergeý barysynda kúdiktiniń áreketterinen Semeı qalasynyń úsh turǵyny zardap shekkeni anyqtaldy. Atap aıtqanda, 20 jastaǵy azamat 715 myń teńgesinen aıyrylǵan. Taǵy bir 21 jastaǵy jábirlenýshi 2 617 myń teńge bergen. Sonymen qatar 63 jastaǵy qala turǵyny 220 myń teńgesinen aıyrylǵan.
Kúdikti óz kinásin tolyq moıyndaǵan. Anyqtalǵandaı, ol azamattardan alynǵan qarajatty jeke maqsattaryna jumsaǵan. Osyǵan baılanysty aqsha qarajaty tárkilenbegen.
Atalǵan fakti boıynsha qylmystyq is alaıaqtyq baby boıynsha saralandy. Kúdiktige qatysty kelý mindettemesi túrindegi protsessýaldyq májbúrleý sharasy qoldanyldy.
Polıtsııa azamattardy kúmándi ınvestıtsııalyq usynystarǵa saqtyqpen qaraýǵa shaqyrdy. Ásirese jyldam ári ońaı tabysqa kepildik beretin usynystarǵa senbeı, qarajat salmas buryn olardyń zańdylyǵy men senimdiligin muqııat tekserý qajet ekeni eskertildi.
Aıta keteıik, Aqtóbede alaıaqtyǵy úshin aıyptalyp jatqan depýtattar bas bostandyǵynan aıyrylýy múmkin.
