Abaı oblysynda TikTok efırinde balaǵat sóz aıtqan boıjetken qamaýǵa alyndy
ASTANA. KAZINFORM — Abaı oblysynda TikTok áleýmettik jelisinde tikeleı efır kezinde balaǵat sóz aıtyp, qoǵamdyq tártipti buzǵan boıjetken ákimshilik jaýapkershilikke tartyldy.
Іshki ister mınıstrliginiń málimetinshe, áleýmettik jelilerge júrgizilgen monıtorıng barysynda polıtsııa qyzmetkerleri quqyqqa qaıshy kontentti anyqtaǵan. Tikeleı efır kezinde boıjetken balaǵat sózder aıtyp, ádepsiz minez-qulyq kórsetken, sondaı-aq esirtki qoldanatynyn málimdegen.
Polıtseıler onyń jeke basyn jedel anyqtady. Quqyq buzýshy Túrkistan oblysynyń týmasy, Semeı qalasynda ýaqytsha turyp jatqan 26 jastaǵy Azıza Qoqanova bolyp shyqty.
Medıtsınalyq kýálandyrý qorytyndysy onyń alkogoldik masań kúıde bolǵanyn kórsetti.
Sot sheshimimen boıjetken Ákimshilik quqyq buzýshylyq týraly kodekstiń usaq buzaqylyqqa qatysty baby boıynsha kináli dep tanylyp, 10 táýlikke ákimshilik qamaýǵa alyndy.
ІІM áleýmettik jelilerdegi quqyqqa qaıshy áreketterdi anyqtaý jáne olardyń jolyn kesý jumystary jalǵasatynyn málimdedi. Vedomstvo ınternet keńistiginde jasalǵan árbir zań buzýshylyqqa quqyqtyq baǵa berilip, zań aıasynda tıisti sharalar qabyldanatynyn eskertti.
Eske salaıyq, buǵan deıin Jambyl oblysynda TikTok-ta tikeleı efır ótkizip, donat jınaý úshin bir-birine ádeıi dene jaraqatyn salǵan eki 19 jastaǵy turǵyn jaýapqa tartylǵanyn habarlaǵanbyz.
