Abaı oblysynda tazalyqty saqtamaǵan 9 myńnan astam azamat anyqtaldy
ASTANA. KAZINFORM — Abaı oblysynda qoǵamdyq oryndar men eldi mekenderdegi tazalyq baqylaýǵa alyndy, dep habarlaıdy oblystyq Polıtsııa departamentiniń baspasóz qyzmeti.
Abaı oblysynyń polıtsııa qyzmetkerleri eldi mekenderdegi qoǵamdyq oryndar men aýmaqtardy baqylaýǵa alyp, quqyq buzýshylyqtardyń aldyn alý boıynsha reıdtik jáne profılaktıkalyq is-sharalar uıymdastyryp jatyr. Negizgi maqsat — azamattardyń qaýipsizdigin qamtamasyz etý ǵana emes, sonymen qatar qoǵamdyq tártip pen tazalyq mádenıetin qalyptastyrý.
Júrgizilgen jumystardyń nátıjesinde 9 myńnan astam ákimshilik quqyq buzýshylyqtyń joly kesildi. Anyqtalǵan barlyq derek boıynsha Qazaqstan Respýblıkasynyń qoldanystaǵy zańnamasyna sáıkes tıisti ákimshilik yqpal etý sharalary qabyldandy. Júrgizilgen jumystardyń nátıjesinde ortaq paıdalanylatyn oryndardy lastaýdyń 780 deregi, sondaı-aq eldi mekenderdi abattandyrý qaǵıdalaryn buzýdyń 8246 faktisi anyqtaldy.
Polıtsııa qyzmetkerleriniń aıtýynsha, quqyq buzýshylyqtyń aldyn alý — kúndelikti jumystyń mańyzdy baǵyttarynyń biri.
— Bizdiń mindetimiz — quqyq buzýshylyq oryn alǵannan keıin ǵana shara qoldaný emes, onyń aldyn alý. Sondyqtan reıdtik is-sharalar barysynda turǵyndarǵa qoldanystaǵy talaptardy túsindirip, eskertý jumystaryn da júrgizemiz. Qoǵamdyq oryndardaǵy tazalyq pen tártip — barshaǵa ortaq jaýapkershilik. Bir adamnyń nemquraıly áreketi aınalasyndaǵylarǵa qolaısyzdyq týǵyzýy múmkin. Sol sebepti ár azamat óz áreketine jaýapkershilikpen qaraǵany mańyzdy, — deıdi polıtsııa qyzmetkerleri.
Quqyq qorǵaý organdarynyń málimetinshe, qoǵamdyq tártipti saqtaý tek polıtsııa qyzmetkerleriniń jumysyna baılanysty emes. Bul baǵytta turǵyndardyń da belsendi azamattyq ustanymy mańyzdy ról atqarady. Belgilenbegen jerge qoqys tastamaý, abattandyrý talaptaryn saqtaý, tabıǵı aýmaqtarǵa zııan keltirmeý jáne qoǵamdyq oryndarda tártipti buzbaý — qarapaıym ári mańyzdy talaptar.
Abaı oblysynyń Polıtsııa departamenti azamattardy qoldanystaǵy zańnama talaptaryn saqtaýǵa, qoǵamdyq oryndarda tártipti buzbaýǵa, qorshaǵan ortaǵa uqypty qaraýǵa jáne tazalyqty saqtaýǵa shaqyrady.
Osydan buryn Almaty oblysynda zańsyz qoqys úıindilerin anyqtaý úshin ǵaryshtyq monıtorıng júrgizilip jatqanyn jazdyq.
