Abaı oblysynda taǵy bir aýyldyń turǵyndary ishimdikten bas tartty

SEMEI. KAZINFORM – Aqsýat aýdanyndaǵy Qojakeldi aýyly Abaı oblysy boıynsha ishimdikten bas tartqan tórtinshi eldi meken bolyp otyr.

Jergilikti ákimdik, aqsaqaldar keńesi, aýyl ımamy, polıtseıler men turǵyndardyń qatysýymen ótken jınalysta ishimdikten túbegeıli bas tartý týraly sheshim qabyldandy.

- Bul salaýatty ómir saltyn ustanyp, turaqtylyq pen tártipti kúsheıte túsý úshin jasalyp otyr. Biraq onsyz da Qojakeldi aýylynda sońǵy bes jyl ishinde alkogoldi ishimdikterdi iship baryp jasalǵan birde-bir qylmys nemese quqyq buzýshylyq tirkelgen joq. Bul turǵyndardyń jaýapkershiligin kórsetedi, - dep habarlady oblystyq Polıtsııa departamentinen.

Aýyl jurtshylyǵy ishimdikten bas tartý otbasylyq qundylyqtardy nyǵaıtyp, jastarǵa úlgi bolatynyna senimdi.

- Іshimdik ishilmeıtin shańyraqta qýanysh, shattyq kóbirek. Kóshelerde de tynyshtyq ornaı túsedi, - deıdi aqsaqaldar.

Osyǵan deıin óńir boıynsha Keńgirbaı bı, Bókenshi jáne Kindikti aýyldarynyń turǵyndary da ishimdikten bas tartqan.

Eske salsaq, buǵan deıin Shyǵys Qazaqstanda taǵy bir aýyl ishimdikten bas tartqany habarlanǵan.