Abaı oblysynda taǵy bir aýyl ishimdikten bas tartty
SEMEI. KAZINFORM - Qazaqstanda halyqtyń densaýlyǵyn nyǵaıtý jáne qoǵamdyq tártipti saqtaý maqsatynda júzege asyrylyp jatqan «Іshimdiksiz aýyl» jobasy naqty nátıje berip jatyr. Sonyń jarqyn mysaly retinde Abaı oblysy Besqaraǵaı aýdanyna qarasty Birlik aýyly erekshe tanylyp otyr, - dep jazdy Polisia.kz.
2025 jyly aýyl turǵyndary biraýyzdan qabyldaǵan sheshimniń nátıjesinde Birlik resmı túrde ishimdiksiz aýyl dep jarııalandy. Bul bastama tek qaǵaz júzinde emes, naqty is júzinde júzege asyrylyp otyr: búginde aýyl dúkenderinde alkogol ónimderi múlde satylmaıdy, al 350 turǵynnyń barlyǵy derlik ishimdik tutynýdan bas tartqan.
Aýyldaǵy mańyzdy sheshim jergilikti ákimdik, ýchaskelik polıtsııa ınspektory, aqsaqaldar keńesi, belsendi jastar men kásipkerlerdiń qatysýymen ótken jıynda qabyldandy. Qoǵamdyq pikir eskerilip, ortaq múdde úshin tarıhı ári jaýapty qadam jasaldy.
Jaqynda Besqaraǵaı aýdanyna issaparmen barǵan Abaı oblysy Polıtsııa departamentiniń bastyǵy Eldar Danııarov aýyl ákimi Qaıratbek Shıngıskenov pen ýchaskelik polıtsııa ınspektory Dýman Erkinbekovke arnaıy alǵys hat tabys etti.
– Quqyq buzýshylyqtyń aldyn alý – bul tek polıtsııanyń ǵana emes, búkil qoǵamnyń ortaq mindeti. Birlik aýyly eger árkim ózgeristi ózinen bastasa, naqty nátıje bolatynyn dáleldep otyr, – dedi ol marapattaý barysynda.
Óz kezeginde ýchaskelik ınspektor Dýman Erkinbekov bastamanyń mán-mańyzy týraly aıtty.
– Biz keleshek urpaqqa taza ári qaýipsiz orta qaldyrǵymyz keledi. Іshimdikten bas tartý – erlik emes, bul – sanaly tańdaý. Birlik aýyly dál osy joldy tańdap, ózgelerge úlgi bolyp otyr, – dep atap ótti.
Qazir aýylda salaýatty ómir saltyn nasıhattaý baǵytynda júıeli jumystar atqarylyp jatyr. Jastar arasynda zııandy ádetterdiń aldyn alý sharalary júrgizilip, aqsaqaldar keńesi óskeleń urpaqqa baǵyt-baǵdar berip, ulttyq qundylyqtardy dáriptep jatyr.
Jergilikti turǵyndar da bastamany tolyq qoldap otyr.
– Іshimdikten bas tartý arqyly biz tek ózimizdi ǵana emes, urpaǵymyzdy da qorǵaımyz. Balalarymyz ishimdiktiń ne ekenin bilmeı ósse, bul – úlken jetistik, – deıdi aýyl turǵyndary.
Aıta keteıik, Qostanaı oblysynda 17 aýyl ishimdikten bas tartty.