Abaı oblysynda taǵy bir aýyl ishimdikten bas tartty

Oblystyq polıtsııa departamenti baspasóz qyzmetiniń málimetine súıensek, Úkili aýylynyń turǵyndary resmı túrde «Alkogolsiz aýyl» mártebesin ıelendi. 

- 51 turǵyny bar, 17 shańyraqtan turatyn eldi meken búginde tatýlyq pen uıymshyldyqtyń jarqyn úlgisin kórsetip otyr. Turǵyndar alkogoldi ishimdikten sanaly túrde bas tartyp, qaýipsiz ári tynysh qoǵamdyq orta qalyptastyrýǵa óz úlesterin qosýda. Bul bastama tek quqyq buzýshylyqtyń aldyn alýǵa ǵana emes, otbasy qundylyqtaryn dáripteýge, jastar arasynda salaýatty ómir saltyn nasıhattaýǵa jáne aýyldaǵy bereke-birlikti odan ári nyǵaıtýǵa baǵyttalǵan, - delingen aqparatta. 

Atalǵan ıgi bastamaǵa Úkili aýylynyń ákimi Áskerbek Berdikenov qoldaý bildirip, eldi meken halqynyń uıymshyldyǵyna joǵary baǵa berdi.

- Bul jetistik - bir ǵana adamnyń emes, búkil aýyl turǵyndarynyń ortaq eńbeginiń nátıjesi. Biz úshin eń basty qundylyq - halyqtyń amandyǵy, balalarymyzdyń jarqyn bolashaǵy jáne aýylymyzdyń tynyshtyǵy. Osy baǵyttaǵy birligimizdi saqtap, aldaǵy ýaqytta da salaýatty ómir saltyn birge nasıhattaı beremiz, - dedi ol. 

Eske salsaq, osyǵan deıin Aqtóbe oblysyndaǵy Qııaqty aýylynyń halqy ishimdikten bas tartqany habarlanǵan.