Abaı oblysynda taǵy bir aýyl halqy ishimdikten bas tartty

SEMEI. KAZINFORM –  Abaı oblysyndaǵy Medeý aýyldyq okrýginiń halqy ishimdikten bas tartty. 

«Alkogolsiz aýyl» atty áleýmettik mańyzy bar bastamaǵa Abaı aýdanynyń Medeý aýyldyq okrýgi qosyldy. Qoǵamdyq jıynda aýyl turǵyndary alkogoldi ishimdikterdi satýdan jáne tutynýdan tolyqtaı bas tartý týraly sheshimdi biraýyzdan qabyldady.

Búginde okrýgte 428 adam turady. 77 aýla jáne 51 sharýa qojalyǵy bar. Medeý aýyldyq okrýginiń ákimi Erkebulan Keńesbekuly bastamanyń aýdan úshin mańyzyn atap ótti.

— Abaı aýdanynda osyndaı tańdaýdy qoldaǵan ekinshi aýyl atandyq. Sheshim halyq tarapynan sanaly túrde qabyldandy. Bul — damýǵa jáne órkendeýge jol ashatyn úlgi, - dedi ol.

Abaı oblysy Polıtsııa departamentiniń bastyǵy Eldar Danııarov bul baǵyttaǵy jumystyń turaqty negizde jalǵasatynyn aıtty.

— Bastama «Zań men tártip» qaǵıdaty aıasynda júzege asyryldy. Endi Medeý aýyldyq okrýgi — salaýatty joldy tańdaýdyń, tynysh aýlalardyń jáne erteńgi kúnge degen senimniń aýmaǵy, - dedi E.Danııarov.

Eske salsaq, osyǵan deıin Shyǵys Qazaqstanda ishimdikten bas tartqan aýyl sany 22-ge jetkeni habarlanǵan.