Abaı oblysynda taǵy bir aýyl ishimdikten bas tartty
SEMEI. KAZINFORM — Abaı oblysynda kezekti aýyl resmı túrde ishimdiksiz aýyl mártebesin aldy. Bul týraly Polisia.kz jazdy.
Abaı oblysy polıtsııa departamentiniń Aqsýat aýdandyq polıtsııa bólimi bastamasymen Satpaev aýyldyq okrýgine qarasty Kóktúbek aýylynda mańyzdy qoǵamdyq bastama júzege asyryldy.
Aýyl turǵyndarynyń qoldaýymen Kóktúbek aýyly resmı túrde «Іshimdiksiz aýyl» dep jarııalandy. Búginde aýylda 211 adam turady jáne bul sheshim jergilikti halyqtyń birligi men ortaq jaýapkershiliginiń aıqyn kórinisi bolyp otyr. Osy bastama aıasynda aýyl turǵyndarymen kezdesý uıymdastyrylyp, qoǵamdyq tártipti saqtaý, quqyq buzýshylyqtardyń aldyn alý, sondaı-aq salaýatty ómir saltyn qalyptastyrý máseleleri jan-jaqty talqylandy.
Kezdesý barysynda aýyldyń aqsaqaldary, polıtsııa ókilderi jáne qoǵam belsendileri óz pikirlerin bildirip, aýyldyń bolashaǵy úshin mańyzdy usynystar aıtty. Jıynǵa qatysýshylar alkogol ónimderin tutynýdy shekteý jáne aýyl ishinde ony taratpaý jóninde ortaq kelisimge keldi.
Bul bastama eń aldymen aýyldaǵy tynyshtyq pen turaqtylyqty saqtaýǵa, qoǵamdyq tártipti nyǵaıtýǵa jáne otbasy qundylyqtaryn dáripteýge baǵyttalǵan. «Alkogolsiz aýyl» bastamasy — tek bir kúndik shara emes, ol aýyldyń uzaq merzimdi damýyna, turǵyndardyń densaýlyǵyn qorǵaýǵa jáne jas urpaqqa úlgili orta qalyptastyrýǵa baǵyttalǵan mańyzdy áleýmettik qadam. Mundaı ıgi bastama jastardyń tárbıesine oń áserin tıgizip, aýyl turǵyndarynyń bir-birine degen qurmeti men jaýapkershiligin arttyra túsedi. Atalǵan kezdesýge Aqsýat aýdandyq polıtsııa bóliminiń bastyǵy Ádilet Baýyrjanov bul bastamanyń mańyzyna toqtalyp ótti.
— «Alkogolsiz aýyl» bastamasy — qoǵam qaýipsizdigin nyǵaıtýǵa baǵyttalǵan ıgi qadam. Tynysh ári tártipti aýyl — eldiń turaqtylyǵy men damýynyń negizi. Kóktúbek aýylynyń turǵyndary bul bastamany qoldap, birlik tanytyp otyrǵany qýantady. Polıtsııa qyzmetkerleri árdaıym halyqpen birlese otyryp qoǵamdyq tártipti qamtamasyz etýge jáne quqyq buzýshylyqtardyń aldyn alýǵa daıyn. Osyndaı ortaq kelisim arqyly biz jastarǵa durys baǵyt kórsetip, qaýipsiz ári berekeli qoǵam qalyptastyra alamyz, — dedi polıtsııa qyzmetkeri.
Óz kezeginde aýyl turǵyndary da bul bastamany tolyq qoldaıtyndyqtaryn bildirip, aýyldyń tynyshtyǵy men bolashaǵy úshin jaýapkershilikti birge atqarýǵa daıyn ekenderin aıtty.
— Aýylymyzdyń berekesi men birligi — bárimiz úshin eń basty qundylyq. Alkogolsiz aýyl bolý — jas urpaqtyń tárbıesine oń áserin tıgizip, aýylymyzda tártip pen tynyshtyqtyń saqtalýyna múmkindik beredi. Biz bul bastamany qoldaımyz jáne aýylymyzdyń damýy úshin birlese jumys isteýge árdaıym daıynbyz. Qazirgi ýaqytta aýylymyzdaǵy dúkende bir-de bir ishimdik satylmaıdy, — dedi aýyl turǵyndary.
Kóktúbek aýyldyq okrýginiń ákimi Gúlnur Qaıratqyzy Aqanjanova óz sózinde bul bastamanyń aýyldyń áleýmettik ahýalyn jaqsartýǵa, turǵyndardyń densaýlyǵyn nyǵaıtýǵa jáne aýyl ishindegi tatýlyq pen birlikti arttyrýǵa yqpal etetinin atap ótti. Onyń aıtýynsha, mundaı bastamalar aýyl ómiriniń sapasyn arttyryp, qoǵamdaǵy jaýapkershilik pen ózara qoldaýdy kúsheıtedi. Kóktúbek aýylynyń «Alkogolsiz aýyl» dep jarııalanýy — aýyl turǵyndarynyń sanaly tańdaýy men ortaq kelisiminiń nátıjesi. Bul bastama aýyldaǵy qoǵamdyq tártipti nyǵaıtyp qana qoımaı, keleshek urpaqqa ónegeli ómir saltyn qalyptastyrýǵa baǵyttalǵan mańyzdy ári úlgili qadam.
Buǵan deıin ShQO-da ishimdikten bas tartqan aýyldar sany 25-ke jetkenin jazǵan edik.