Abaı oblysynda taǵy 7 órt sóndirý beketi ashylady
SEMEI. KAZINFORM – Abaı oblysynda qosymsha 7 órt sóndirý beketin qurý josparlanýda. Abaı oblysy ákimdiginiń málimetine súıensek, aımaq boıynsha órttiń aldyn alý maqsatynda birqatar shara qolǵa alyndy. 2023 jyly «Aq Ertis» qoǵamdyq qory esebinen 11 órt sóndirý tehnıkasy jáne 363 jabdyq satyp alynǵan.
«Atap aıtqanda, 4 órt sóndirý mashınasy, 5 shaǵyn orman patrýldik keshen, 2 JAC T6 avtokóligi, órt sóndirý mashınalaryna arnalǵan 25 qozǵaltqysh, 20 benzındi motopompa jáne 307 rıýkzakty órt sóndirgish, 6 orman órtin sóndiretin rıýkzakty qurylǵy jáne 2 benzındi ara alyndy. Budan bólek respýblıkalyq bıýdjet esebinen «Semeı ormany» rezervaty 34 órt sóndirý tehnıkasy men 323 jabdyqpen qamtamasyz etildi. Onyń ishinde 10 órt sóndirý mashınasy, 14 shaǵyn orman órti kesheni, 107 mobıldi jáne 216 tasymaldy ratsııa bar. Órt kezinde jedel áreket etý úshin eldi mekenderde 13 órt tehnıkasy bar 10 órt sóndirý beketi quryldy. 2024 jylǵa oblystyń TJD tehnıkasynyń 7 birligin bere otyryp, qosymsha 7 órt sóndirý beketin qurý josparlanýda. Óńir boıynsha barlyǵy 62 órt sóndirý beketinde 70 tehnıka bar», - delingen aqparatta.
Termııalyq núktelerdiń ǵaryshtyq monıtorıngin júrgizý úshin «QazaqstanǴaryshSapary» UK» AQ-men kelisimshart jasaldy. Sonymen qatar aerovızýaldy tekserýler júrgizý jáne tótenshe jaǵdaılarǵa jedel den qoıý maqsatynda «Qazavıaqutqarý» AQ-pen tikushaq tartý jóninde kelisimshartqa qol qoıylǵan. Semeı qalasy áýejaıynyń bazasymen Qorǵanys mınıstrliginiń oblystyq fılıalynyń avıabazasynda sý tógetin qurylǵylary bar 3 MI-8 áýe kemesi kezekshilik etýde.
«Orman-dala alqaptarynda órt qaýipsizdigin qamtamasyz etý úshin osy jyly quramynda túrli organdar men mekemelerdiń ókilderi bar 32 birlesken mobıldi top quryldy. Búgingi tańda oblystyń 94 eldi mekeninde aýmaqtardy qurǵaq ósimdikterden jáne janǵysh qoqystardan tazartý júrgizildi. Eldi mekender men avtomobıl joldarynyń aınalasynda uzyndyǵy 437,8 shaqyrym mıneraldanǵan jolaqtar quryldy. Osy baǵyttaǵy jumystar jalǵasýda ári qatań baqylaýda», - delingen habarlamada.