Abaı oblysynda sýǵa shomylý maýsymynda ózen-kólderde qutqarýshylar kezekshilik etedi
SEMEI. KAZINFORM – Abaı oblysynda sýǵa shomylý maýsymynda demalýshylardyń qaýipsizdigin qamtamasyz etý maqsatynda ózen-kólderde qutqarýshylar kezekshiligi uıymdastyryldy.
Oblys ákimi Nurlan Uranhaevtyń tóraǵalyǵymen tótenshe jaǵdaılardyń aldyn alý jáne joıý jónindegi komıssııanyń otyrysy ótti. Kún tártibinde sýǵa shomylý maýsymynda óńirdegi ózender men kólderde qaýipsiz demalysty uıymdastyrý, mańyzdy áleýmettik nysandar men kólik ınfraqurylymyndaǵy 2024-2025 jyldardaǵy qysqy jáne sý tasqyny kezeńderine daıyndyq jónindegi sharalar qaraldy.
«Sýǵa túsý maýsymy qarsańynda TJD jedel-qutqarý jasaǵynyń qyzmetkerleri jergilikti atqarýshy organdardan Semeı qalasyndaǵy («Zarıa» jáne «Prıstan» jaǵajaılary), Borodýlıha aýdanyndaǵy (Shúlbi sý qoımasy), Besqaraǵaı aýdanyndaǵy (Shoshqaly kóli), Kýrchatov qalasyndaǵy (Ertis ózeni jaǵalaýy) jáne Alakól jaǵalaýyndaǵy akvatorııalardyń túbin tekserýge ótinimder qabyldady. Jazda sý aıdyndarynda memlekettik organdar jáne eriktilermen birlesip patrýldeý men reıdter ótkiziledi. Demalýshylardyń qaýipsizdigin qamtamasyz etý úshin departament shomylý maýsymy kezeńinde qaıyqty alty mobıldi bekettiń kezekshiligin uıymdastyrdy», - dep habarlady Abaı oblysy ákimdiginen.
Oblystyq TJD otyrysynda qala men aýdan ákimderimen birlesip shomylý oryndarynda qaýipsizdik sharalaryn kúsheıtý tapsyryldy.
«Halyqqa túsindirý jumystaryn keńinen júrgizý qajet. Ásirese jazǵy demalys ýaqytynda balalardyń qaýipsizdigi basty nazarda bolýy kerek. Sonymen qatar aldaǵy qysqy maýsymǵa daıyndyq týraly da umytpaǵanymyz jón. Bizdiń basty maqsatymyz – turǵyndardyń qaýipsizdigin qamtamasyz etý, tótenshe jaǵdaılardyń aldyn alý jáne kez kelgen syn-qaterlerge daıyn bolý», - dedi oblys ákimi Nurlan Uranhaev.
Respýblıkalyq mańyzy bar avtojoldar ýchaskelerin kútip ustaý boıynsha «KAJservıs» JShS qyzmet kórsetedi. Abaı oblysynda jeti jol-paıdalaný ýchaskesi, jalpy sany 293 adam jumys isteıtin 15 jol-paıdalaný pýnkti bar. Qys mezgilindegi jumystardy oryndaý úshin 90 tehnıka ázir. Oblystyq mańyzy bar avtojol ýchaskelerin kútip ustaýdy «Semeı joldary» JShS atqarady. Olar qysqy jumystarǵa jalpy sany 120 adam jáne 80 tehnıka bar úsh qosalqy merdiger uıymdy qamtıdy.
«Energetıka jáne turǵyn-úı kommýnaldyq sharýashylyq, jolaýshylar kóligi jáne avtomobıl joldary basqarmalaryna qala jáne aýdan ákimderimen birlesip áleýmettik mańyzy bar nysandar men kólik ınfraqurylymynyń daıyndyǵyn baqylaý tapsyryldy. Sondaı-aq aımaq basshysy barlyq jóndeý, daıyndyq jumystary merziminde aıaqtalýy tıis ekendigin atap ótti», - delingen ákimdik aqparatynda.
