Abaı oblysynda sý shaıyp ketken joldar qalypqa keltirilip jatyr
SEMEI. KAZINFORM – Abaı oblysynda tasqyn sýdan keıin respýblıkalyq jáne oblystyq mańyzy bar joldarda qalypqa keltirý jumystary júrgizilýde.
2 sáýir kúni Kókpekti aýdany úshin mańyzy bar «Úlkenbóken-Kókjaıyq» jolynda qyzyl sý júrip, Kókjaıyq aýylyna kireberistegi uzyndyǵy 4 shaqyrym jol jabylǵan. Osy joldyń jıegin sý shaıyp ketken bolatyn.
«Qazirgi ýaqytta osy jol jıekterin nyǵaıtý jáne sý ótkizý qubyrlaryn qalypqa keltirý jumystary júrgizilýde. 7 arnaıy tehnıka, onyń ishinde 5 KamAZ, 1 tıegish, 1 ekskavator jáne 12 adam jumyldyrylǵan», - dep habarlady Abaı oblysy ákimdiginen.
Aqsýat aýdanynda sý tasqynynan keıin joldardy qalypqa keltirý jalǵasýda. Máselen, «Semeı joldary» JShS oblystyq mańyzy bar «Sátbaev-Aqsýat» jolyndaǵy buzylǵan ýchaskelerdi qalpyna keltirdi.
Qyzylkesik aýyldyq okrýginde Orta Boǵas ózeni arqyly Egindibulaq aýylyna ótetin ótkeldiń búlingen ýchaskelerin qaıta qalpyna keltirý jumystary aıaqtalǵan. Búginde Egindibulaq jáne basqa da qystaqtarmen jol qatynasy ashyldy, eshqandaı kedergi joq.
