Abaı oblysynda sý basqan úıler joq
ASTANA. KAZINFORM – Abaı oblysynda sý basqan úıler joq. Bul týraly Abaı oblystyq TJD TJ aldyn alý basqarmasy bastyǵynyń mindetin atqarýshy Azamat Kýnafın aıtty.
«Qazirgi ýaqytta Abaı oblysynda sý tasqyny jaǵdaıy turaqty. Oblys aýmaǵynda qar basqan aýmaq qysqardy jáne 9 paıyzdy quraıdy. Jergilikti atqarýshy organdar TJM, PD, QM, eriktilermen birlesip, eldi mekenderdi sý basýyna jol bermeý úshin jumys istep jatyr. Búginge deıin 136 aýlany, 22 úıdi sý basqan bolatyn. Degenmen, úılesimdi sharalardyń arqasynda sýdy bura aldyq. Qazirgi ýaqytta sý basqan úıler joq», - dedi ol Ortalyq kommýnıkatsııalar qyzmetindegi brıfıngide.
Onyń atap ótýinshe, oblystyń ońtústik jáne ońtústik-shyǵys óńirlerindegi ózenderdiń deńgeıi aıtarlyqtaı tómendedi. Gıdrotehnıkalyq qurylystar tranzıttik rejımde jumys istep tur.
«Barlyq múddeli organdar, shtabtar men kommýnaldyq qyzmetter kúsheıtilgen rejımde jumys istep jatyr. Sý tasqyny ahýaly kúrdelengen jaǵdaıda kúshter men quraldar únemi daıyndyqta tur», - dedi Azamat Kýnafın.
Eske sala keteıik, buǵan deıin Aqmola oblysynyń Astrahan aýdanynda tótenshe jaǵdaı jarııalanǵanyn jazǵan edik.
