Abaı oblysynda sottalǵan adam 3 jyl buryn kisi óltirgenin moıyndady
SEMEI. KAZINFORM – Іshki ister mınıstrliginiń krımınalısteri men jedel qyzmetkerleri Abaı oblysy turǵynynyń úsh jyldan astam ýaqyt boıy habar-osharsyz joǵalý deregi retinde tirkelip kelgen aýyr qylmystyń betin ashty.
Oqıǵa 2023 jyldyń qyrkúıeginde bastalǵan. Sol kezde jergilikti turǵyn polıtsııaǵa habarlasyp, joldasynyń joǵalyp ketkeni týraly aıtqan.
Er adam jumys isteý úshin basqa jaqqa ketkennen keıin otbasymen baılanysyn kenetten úzgen. Alǵashqy kúnderi aýqymdy izdestirý jumystary júrgizilip, oqıǵa mańy túgel tekserilgenimen, nátıje bolmady. Er adam iz-túzsiz joǵalyp ketkendeı bolǵan.
Naqty aıǵaqtar bolmaǵanyna qaramastan, izdestirý isi jabylǵan joq. Jedel qyzmetkerler joǵalǵan azamattyń aralasqan ortasyn jiti tekserip, qylmystyq áreketke qatysty nusqalardy da pysyqtady. Aqyry onyń joǵalar aldynda baılanysta bolǵan adamdardyń ómirbaıany men derekterin muqııat saralaý nátıjesinde kúdiktiniń izine tústi.
Polıtsııa nazaryna óńir turǵyny ilikken. Ol 2023 jyldyń kúzinen keıin basqa qylmys jasap, sottalǵan jáne jazasyn óteý úshin kolonııaǵa jiberilgen. Quqyq qorǵaý organdary derekterdi salystyryp, aıǵaqtardy jınaqtaǵan soń, sottalǵan azamatqa qatysty birqatar jedel is-shara júrgizdi.
Er adam qylmysyn moıyndady.
– Jedel-izdestirý sharalary barysynda polıtseıler kúdiktiniń izine tústi. Onyń kisi óltirý qylmysyn jasaǵannan keıin basqa qylmysy úshin sottalyp, bas bostandyǵynan aıyrý oryndarynda jazasyn ótep jatqany anyqtaldy. Qosymsha keshendi jumystardyń nátıjesinde kúdikti qylmysyn moıyndap, onyń mán-jaıyn egjeı-tegjeıli aıtyp berdi jáne máıit jasyrylǵan jerdi kórsetti, – dep habarlady Іshki ister mınıstrligi.
Endi jazasyn ótep jatqan azamat kisi óltirý qylmysy úshin de sot aldynda jaýap beredi.
Tergeý aıaqtalyp, aıyptaý aktisimen birge qylmystyq is sotqa joldandy.
Eske salsaq, buǵan deıin Qostanaıda 86 jastaǵy qarııany óltirdi degen kúdikpen 17 jastaǵy jasóspirim ustalǵany habarlanǵan.