Abaı oblysynda sotta jalǵan sóılegen kýáger 5 jylǵa bas bostandyǵynan aıyryldy

SEMEI. KAZINFORM – Abaı oblysy Jarma aýdandyq sotynda jalǵan sóıleý faktisi boıynsha qylmystyq is qaraldy.

Sottyń baspasóz qyzmetiniń habarlaýynsha, T. esimdi azamat brakonerlikke qatysty basqa bir qylmystyq is boıynsha kýá retinde shaqyrylǵan. Sot kezinde ol qasaqana jalǵan málimet bergen.

- Onyń bul áreketi sotty jańylystyrdy. Sol arqyly er adam tanysyna qylmystyq jaýapkershilikten jaltarýǵa kómektespek bolǵan, - delingen aqparatta.

Sot T.-ny Qylmystyq Kodekstiń 420-baby boıynsha (kórineý jalǵan aıǵaq berý) kináli dep tanydy. Sot sheshimimen aıyptalýshy 5 jylǵa bas bostandyǵynan aıyryldy.

Eske salsaq, osyǵan deıin Óskemen turǵyny kóligine qulaǵan aǵash úshin kommýnaldyq mekemeden 2,5 mln teńge óndirip alǵany habarlanǵan.