Abaı oblysynda sot jol jóndegen merdigerdiń ótinishin qanaǵattandyrmady

SEMEI. KAZINFORM — Abaı oblystyq soty merdigerdiń respýblıkalyq mańyzy bar joldy jóndeýge jumsaǵan 48,8 mıllıon teńgeni óndirý týraly ótinishin qanaǵattandyrmady.

Sebebi, jóndeý jumystarynda anyqtalǵan qatelikterge baılanysty tapsyrys berýshi jumysty qabyldamaǵan.

Kelisimsharttyń quny 1 mıllıard teńgege jýyqtaǵan. Merdiger jumystyń bir bóligi aıaqtalǵanyn, soǵan sáıkes qarjy tólenýi qajet ekenin alǵa tartty. Alaıda Jol aktıvteriniń ulttyq sapa ortalyǵynda zerthanalyq synamalar boıynsha kemshilikterdiń bar ekeni rastaldy. Sondyqtan tapsyrys berýshi jumysty aıaqtaý aktilerine qol qoımaǵan. 

— Sapany tekserý esepterge qol qoıý aldynda júrgiziledi. Ol bolmaǵan jaǵdaıda jumys aıaqtalmaǵan dep esepteledi, — dep atap ótti sot.

Merdigerdiń jóndeýden keıin biraz ýaqyttan soń jasatqan saraptamasy da qabyldanbady.

— Jol ýchaskesin uzaq ýaqyt paıdalanǵannan keıin júrgizilgen saraptama jumystyń aıaqtalǵan kezdegi jaǵdaıyn dál kórsete almaıdy, — dep túsindirdi mamandar.

Apellıatsııalyq keńes bul sheshimdi ózgerissiz qaldyrdy. Sot bul adam qaýipsizdigine tikeleı qatysty joba ekenin, sondyqtan jol qurylysyna qoıylatyn sapa talaptary qatań saqtalatynyn qatań eskertti.

Eske sala keteıik, Qostanaı óńirinde jol sapasyna qatysty 280 kemshilik tirkeldi.