Abaı oblysynda ishimdikten bas tartqan aýyldar sany 30-ǵa jetti

Abaı oblysynyń Besqaraǵaı aýdanyndaǵy shaǵyn ǵana Cheremýshka aýyly búginde úlken ózgeristiń sımvolyna aınaldy. Nebári 25 aýla, 60 turǵyn. Biraq dál osy aýyl elge úlgi bolarlyq batyl sheshim qabyldap, alkogolden tolyqtaı bas tartty.

Bul — jaı ǵana bastama emes. Bul — zań men tártipke negizdelgen jańa qoǵamdyq mádenıettiń bastaýy. Tańmen talasa mal óriske shyǵady, tehnıka úni estiledi, balalar kúlkisi jańǵyrady. Al aýyl kóshelerinde tynyshtyq pen senim saltanat qurǵan. Cheremýshka halqy tártip bar jerde — bereke bar ekenin jaqsy túsinedi.

Zańǵa qurmet bar jerde — qaýipsizdik bar. Osy baǵyttaǵy mańyzdy kezdesýde aýyldyń ýchaskelik polıtsııa ınspektory Aset Sagadıev turǵyndarǵa qoǵamdaǵy turaqtylyqtyń mańyzyn erekshe atap ótti.

— Zań men tártip — memlekettiń ǵana emes, ár shańyraqtyń qorǵany. Qoǵamdaǵy tynyshtyq eń aldymen adamnyń óz tańdaýynan bastalady. Sizderdiń búgingi qadamdaryńyz — erteńgi urpaqtyń qaýipsiz bolashaǵyna salynǵan berik negiz, — dedi Aset Sagadıev.

Tártip saqshysynyń aıtýynsha, alkogolden bas tartý — tek densaýlyq máselesi emes. Bul — quqyq buzýshylyqtyń aldyn alý, turmystyq janjaldardy azaıtý, jastar arasynda tártip mádenıetin qalyptastyrýdyń tıimdi joly. Shynynda da, búgin Cheremýshkada mas kúıdegi janjal joq. Túngi tynyshtyqty buzatyn daýys joq. Esesine sport alańyndaǵy jastardyń belsendiligi, eńbekke umtylǵan azamattardyń jigeri bar.

Aýyl ákimi Talǵat Qumarov bul bastamany aýyldyń bolashaǵyna jasalǵan mańyzdy ınvestıtsııa dep baǵalady.

— Biz tek ishimdikten bas tartyp otyrǵan joqpyz. Biz aýyldaǵy tártipti, birlikti, jaýapkershilikti kúsheıtip otyrmyz. Ár otbasynyń amandyǵy — búkil aýyldyń turaqtylyǵy, — dedi aýyl ákimi.

Cheremýshkadaǵy ózgeris eń aldymen adamdardyń sanasynan bastaldy. Bir-birine janashyrlyq tanytqan turǵyndar ortaq sheshim qabyldap, aýyl taǵdyryna beıjaı qaramaıtyndaryn dáleldedi. Aýyl aqsaqaly Seıithan ata bul bastamany «urpaqqa qalatyn ónege» dep baǵalady.

— Buryn «aýyldyń berekesi — birlikte» deýshi edi. Búgin sonyń naqty kórinisin kórip otyrmyz. Densaýlyqty saqtaǵan eldiń rýhy da myqty bolady, — dedi aqsaqal aq batasyn berip.

Búginde Cheremýshkada jańa qundylyq qalyptasyp keledi. Munda zańdy qurmetteý — talap qana emes, ómir saltyna aınalǵan. Jastar úlkenge qarap boı túzeıdi. Balalar qaýipsiz ortada ósip keledi. Al turǵyndar qoǵamdyq tártipti saqtaýdy ortaq mindet dep túsinedi. «Zań men tártip» qaǵıdaty dál osyndaı eldi mekenderden bastaý alady. Sebebi qaýipsiz qoǵam — sanaly azamattan, al sanaly azamat — tártipten qalyptasady. Cheremýshka — búgin shaǵyn aýyl bolýy múmkin. Biraq onyń tańdaýy — úlken úlgi.

Aıta keteıik, buǵan deıin Qyzylorda oblysynda ishimdiksiz aýyldar sany 37-ge jetken edi.