Abaı oblysynda sheneýnikter 24 mln teńge sýbsıdııany zańsyz bólgen
SEMEI. KAZINFORM — Abaı oblysynda Aýyl sharýashylyǵy basqarma basshysynyń orynbasary men mamany tıisti ruqsatsyz jalpy somasy 24 mln teńge bolatyn 35 sýbsıdııany zańsyz bólgen. Bul týraly Abaı oblysy prokýratýrasynyń baspasóz qyzmeti habarlady.
Oblystyń mamandandyrylǵan tabıǵat qorǵaý prokýratýrasy jaıylymdardy sýlandyrý men mal sharýashylyǵy nysandaryn sýmen qamtamasyz etýge jumsalǵan shyǵyndardyń bir bóligin óteý boıynsha sýbsıdııalar bólý barysynda zań buzýdy anyqtady.
Qoldanystaǵy zańnamaǵa sáıkes, sýbsıdııa alýdyń sharttarynyń biri arnaıy sý paıdalaný ruqsatynyń bolýy.
— Aýyl sharýashylyǵy basqarma basshysynyń orynbasary men mamany tıisti ruqsatsyz jalpy somasy 24 mln teńge bolatyn 35 sýbsıdııany zańsyz bólgen, — delingen habarlamada.
Prokýrorlyq qadaǵalaý aktisiniń nátıjesinde atalǵan tulǵalarǵa qyzmetine tolyq sáıkes emestigi týraly eskertý túrinde tártiptik jaza qoldanyldy.
Aıta ketelik keıbir uıymdar bıýdjetti kredıtti depozıtke salyp, paıda taýyp otyrǵany týraly jazǵan edik.