Abaı oblysynda shanhaılyq iri kompanııalarmen birlesken jobalar iske asyrylmaq
SEMEI. KAZINFORM – Abaı oblysynyń ákimdiginde shanhaılyq iri kompanııalar ókilderimen kelissóz jasaldy.
Abaı oblysynyń ákimdiginde «China Triumph International Engineering Co. Ltd» kompanııasynyń ókilderimen kezdesý ótti. Jıynda óńirdiń ónerkásiptik jáne ındýstrııalyq-ınnovatsııalyq damý máseleleri talqyǵa salyndy.
«Kelissózge oblys ákiminiń orynbasarlary Dımıtrıı Garıkov, Ádilbek Musabaev, basqarmalar men saıası partııalardyń basshylary qatysty. Dóńgelek ústel basyna jınalǵandar energetıka, energııa únemdeý, turǵyn úı-kommýnaldyq sharýashylyq, ınfraqurylym jáne abattandyrý salalarynda birlesken jobalardy iske asyrýǵa erekshe nazar aýdardy», - dep habarlady oblys ákimdiginen.
Shanhaılyq Sanei Elevator kompanııasynyń ókilderi óz kezeginde Abaı óńirinde joǵary sapaly jedelsatylardy óndirýmen aınalysýǵa múddeli ekenderin atap ótti. Atalǵan kompanııa 1987 jyldan beri Qytaıda jedelsaty jasap shyǵarýmen aınalysyp kele jatqan alǵashqy ulttyq kásiporyn.
«Qos tarap ortaǵa salǵan usynystardyń negizgi maqsaty – oblystyń ekonomıkasyn nyǵaıtýǵa yqpal etý jáne agroónerkásiptik keshendi, jolaýshylar kóligi men avtomobıl joldary salasyn damytýdyń jańa deńgeıine qol jetkizý», - delingen aqparatta.
