Abaı oblysynda sarbaz kóz jumdy
SEMEI. KAZINFORM – Abaı oblysy Aıagóz aýdanynda 18 jastaǵy merzimdegi sarbaz mert boldy.
Qorǵanys mınıstrliginiń málimetine súıensek, 19 mamyrda Aıagóz qalasynyń ortalyq aýdandyq aýrýhanasynda merzimdi áskerı qyzmetshi bakterıaldy menıngıttiń gıpertoksıkalyq túrinen qaıtys boldy.
— 16 mamyr kúni keshke sarbaz álsizdik jáne dene qyzýynyń kóterilýi shaǵymdarymen Aıagóz áskerı gospıtaline jatqyzyldy. Bastapqy tekserýden jáne emdeýden keıin jaǵdaıy jaqsarmaǵan. 17 mamyrda qosymsha tekserýler júrgizilip, sonyń qorytyndysy boıynsha naýqas odan ári emdelý úshin Aıagóz ortalyq aýdandyq aýrýhanasyna jiberildi, — delingen aqparatta.
18 mamyrda áskerı qyzmetkerdiń jaǵdaıy kúrt nasharlady. Dárigerler jansaqtaý sharalaryn jasaǵanymen ony aman alyp qala almaǵan.
Sarbaz 2025 jyldyń 25 sáýirinde Soltústik Qazaqstan oblysynan áskerı qyzmetke shaqyrylǵan. Ol bir aıǵa jýyq ýaqyt qana áskerı boryshyn ótep úlgerdi. Onyń ólimine qatysty qylmystyq is qozǵaldy.
— Qurlyq áskerleri qolbasshylyǵy marqumnyń týǵan-týystary men jaqyndaryna qaıǵylaryna ortaqtasyp kóńil aıtady. Olarǵa barlyq qajetti kómek pen qoldaý kórsetiledi, — delingen habarlamada.
Eske salsaq, osyǵan deıin sarbazdardyń psıhıkalyq jaǵdaıyn jasandy ıntellektiniń kómegimen anyqtalatyndyǵy habarlanǵan.