Abaı oblysynda rýlge ıe bola almaı, aǵashqa soǵylǵan kólik júrgizýshisi kóz jumdy

SEMEI. KAZINFORM — Abaı oblysy Borodýlıha aýdanynda jol apatynan 1 adam qaza boldy. 

Oblystyq Polıtsııa departamenti baspasóz qyzmetiniń málimetine súıensek, jol-kólik oqıǵasy 10 sáýirde tańǵy ýaqytta «Semeı-Borodýlıha» tasjolynyń 16-shaqyrymynda bolǵan.

— Volkswagen Passat markaly avtokóliktiń 33 jastaǵy júrgizýshisi Borodýlıha aýylyna qaraı kele jatqan. Kenet ol rýlge ıe bola almaı, jol jıeginen shyǵyp ketip, aǵashqa soǵylǵan. Jol apaty saldarynan júrgizýshi sol jerde kóz jumdy, - delingen aqparatta.

Qazirgi ýaqytta atalǵan fakti boıynsha polıtsııa sotqa deıingi tergep-tekserý jumystaryn bastady.

Eske salsaq, osyǵan deıin Almatyda mototsıkl qaǵyp, eki jol jumysshysy mert bolǵany jaıly jazǵanbyz.