Abaı oblysynda ruqsatsyz qum satqan eki kásipker 150 mln teńge tabys tapqan

ASTANA. KAZINFORM – Qarjylyq monıtorıng agenttigi Abaı oblysy boıynsha departamenti eki kásipkerge qatysty qylmystyq isti aıaqtady.

- Olar 2023 jyldyń qyrkúıegi men 2024 jyldyń qazany aralyǵynda Semeı qalasy aýmaǵynda lıtsenzııasyz qum óndirip, satqan.

Nátıjesinde kúdiktiler zańsyz túrde 68 myń tonnadan astam qum óndirip, memleketke 272 mıllıon teńge kóleminde zalal keltirgen.

Keıinnen qurylys materıaldaryn óndirýshi zaýyttarǵa qumdy ótkizý jalǵan sáıkestik sertıfıkattaryn paıdalana otyryp, jeke kásipkerler arqyly júzege asyrylǵan, - dep jazdy Qarjylyq monıtorıng agenttiginen.

Derekke qaraǵanda, ony satýdan túsken qylmystyq tabys 150 mıllıon teńgeden asty.

Kúdiktiler osy qarajattyń bir bóligin frontaldy tıegish satyp alýǵa jumsap, qosymsha 6,2 mıllıon teńge mólsherinde tabys tapqan.

Sottyń sanktsııasymen kúdiktilerdiń 181 mıllıon teńgeden astam somaǵa baǵalanǵan múlkine tárkileý maqsatynda tyıym salyndy.

Múlikterdiń qatarynda 11 avtokólik, 2 páter, jer ýchaskesi jáne 17 mıllıon teńge kólemindegi debıtorlyq qaryz bar.

Іs aıyptaý aktisin bekitý úshin prokýrorǵa joldandy.

Aıta keteıik, Abaı oblysynda qylmystyq top ormannan 500 mln teńgeniń aǵashyn urlaǵan.