Abaı oblysynda referendýmda 400 myńnan astam adam daýys berý quqyǵyna ıe
SEMEI. KAZINFORM – Abaı oblysynda 465 referendým ýchaskesi qurylǵan.
Onyń ishindegi 429-y turǵylyqty jeri boıynsha, al 36-sy ýaqytsha bolatyn oryndarda ornalasqan. Oblystyń aýmaqtyq referendým komıssııalarynyń quramyna 91 adam múshe. Onyń 7-eýi oblystyq komıssııada, al 84-i qalalyq jáne aýdandyq komıssııalarda jumys isteıdi.
- Ýchaskelik referendým komıssııalary jalpy sany 3163 adamnan turady. Saılaýshylar tizimine 400 151 adam engizildi. Saılaýshylarǵa keńes berý úshin 13 baılanys ortalyǵy jumys isteıdi. Onyń ishinde aımaq turǵyndarynyń barlyǵyna qyzmet kórsetetin biryńǵaı «109» baılanys ortalyǵy, qalalar men aýdandarda 12 jergilikti baılanys ortalyǵy bar, - dep habarlady Abaı oblysynyń saılaý komıssııasynan.
Barlyq saılaý ýchaskeleri múmkindigi shekteýli azamattarǵa arnalǵan arnaıy buryshtarmen jabdyqtalǵan. Kórý qabileti buzylǵan saılaýshylar úshin aýdıomaterıaldar men arnaıy trafaretter daıyndaldy.
- Ýchaskelerde erekshe qajettilikteri bar azamattardyń jasyryn daýys berýine arnalǵan arnaıy kabınalar uıymdastyrylady. Daýys berý kúni 28 arnaıy avtokóligi bar «Invataksı» qyzmeti jumys isteıdi. Áskerı bólimderde ornalasqan 9 referendým ýchaskesinde zańnamaǵa sáıkes aýmaqtyq komıssııalardyń sheshimimen daýys berý tańǵy saǵat 6:00-de bastalady, - delingen aqparatta.
Eske salsaq, osyǵan deıin Shyǵys Qazaqstandaǵy saılaý ýchaskeleriniń referendýmǵa daıyndyǵy qalaı ekendigi jaıly jazǵanbyz.
