Abaı oblysynda prokýrorlardyń arqasynda 160 mln teńge bıýdjet qarjysy únemdeldi

SEMEI. KAZINFORM – Bul týraly Abaı oblystyq prokýratýrasynyń baspasóz qyzmeti habarlady.

Baspasóz qyzmetiniń málimetterine qaraǵanda, jylýmen jabdyqtaý salasyndaǵy tabıǵı monopolııa sýbektileri zań talaptaryn buza otyryp, memlekettik satyp alý arqyly 3,5 mlrd teńgeden astam somaǵa joǵary baǵamen kómir satyp almaqshy bolǵan.

Prokýratýra qabyldaǵan sharalar boıynsha satyp alý toqtatylyp, jylýmen jabdyqtaýshy kásiporyndar kómir óndirýshisimen tikeleı shart jasasty. Osylaısha 160 mln teńgeden astam qarjy únemdeldi. Bul qarajat kásiporyndardyń qyzmetkerleriniń áleýmettik tólemderine jumsalady.

- Negizsiz bıýdjet shyǵyndaryn qysqartý máselesi oblys prokýratýrasynyń turaqty baqylaýynda, - delingen prokýratýranyń habarlamasynda.

Osyǵan deıin Abaı oblysynyń ekonomıkalyq tergeý departamentine jańa basshy taǵaıyndalǵany týraly jazdyq.