Abaı oblysynda prokýratýranyń yqpalymen 12 mlrd teńgelik jobanyń máselesi sheshildi
SEMEI. KAZINFORM - Abaı oblysynyń prokýratýrasy Investorlardyń quqyqtaryn qorǵaý komıtetimen birlesip, óńirde iri ınvestıtsııalyq jobany júzege asyryp jatqan «Arx Minerals» JShS-niń quqyqtaryn qorǵaýdy qamtamasyz etti, dep habarlaıdy Abaı oblysy prokýratýrasynyń baspasóz qyzmeti.
Kompanııa mys kenin óndirý jáne óńdeý zaýytynyń qurylysyn júrgizip jatyr. Jalpy ınvestıtsııa kólemi 12 mlrd teńgeden asady, 120-dan astam jańa jumys ornyn qurý kózdelgen.
Jobany súıemeldeý barysynda Jer qatynastary bólimi tarapynan ınvestorǵa jobany odan ári iske asyrý úshin qajetti elektr berý jelisi tirekteriniń koordınattaryn kelisýden bas tartylǵany anyqtaldy.
Bas tartýǵa ınvestordyń qoldanystaǵy elektr berý jelisi tirekteri ornalasqan jer ýchaskeleriniń aýktsıonǵa shyǵarylýy sebep bolǵan.
-Jańasemeı aýdany prokýratýrasynyń aralasýynan keıin atalǵan jer ýchaskeleri aýktsıonnan alynyp tastalyp, ınvestordyń buryn jobalanǵan jer ýchaskelerine túzetý engizý týraly ótinimin qaraý qaıta jalǵastyryldy. Qabyldanǵan sharalar ákimshilik kedergilerdi joıýǵa jáne ınvestıtsııalyq jobany odan ári iske asyrýdy qamtamasyz etýge múmkindik berdi,-delingen habarlamada.
Abaı oblysynyń prokýratýrasy quqyqtarynyń buzylýyna nemese ákimshilik kedergilerge tap bolǵan ınvestorlar +7 707 144 00 16 telefony nemese 115 Call-ortalyǵy arqyly habarlasa alatynyn eske salady.
Osyǵan deıin ShQO-da prokýratýra aralasqannan keıin 811 turǵyn qajetti dári-dármekpen qamtamasyz etildi.
