Abaı oblysynda prokýratýra 172 júrgizýshige zańsyz aıyppul salynǵanyn anyqtady
SEMEI. KAZINFORM – Abaı oblysy Aıagóz aýdanynyń prokýratýrasy jol qozǵalysy erejelerin buzý áreketterin avtomatty túrde tirkeıtin kameralardyń jumysynan zań buzýshylyqtardy anyqtady.
Abaı oblysy prokýratýrasynyń baspasóz qyzmetiniń habarlaýynsha, Aıagóz qalasyndaǵy kóshelerdiń birinde kólik qozǵalysyna ruqsat etilgen jyldamdyq saǵatyna 60 km bolǵanyna qaramastan, avtomatty tirkeý kesheniniń baptaýlarynda shekti jyldamdyq 40 km/saǵ retinde qate belgilengeni anyqtaldy.
Osynyń saldarynan 172 azamat ákimshilik jaýaptylyqqa zańsyz tartylǵan. Prokýrorlyq qadaǵalaý aktisi boıynsha zańsyz shyǵarylǵan qaýlylardyń barlyǵynyń kúshi joıylyp, tólengen aıyppuldardy qaıtarý jumystary uıymdastyryldy.
Qazirgi tańda kólik ıelerine 800 myń teńgeden astam qarajat qaıtaryldy. Qarajattardy qaıtarý jumystary jalǵasý ústinde.
-Abaı oblysynyń prokýratýrasy azamattarǵa ákimshilik jaýaptylyqqa zańsyz tartý faktileri anyqtalǵan jaǵdaıda, óz quqyqtaryn qalpyna keltirý úshin ýákiletti memlekettik organdarǵa nemese prokýratýra organdaryna júginýge quqyly ekenin túsindiredi,-delingen habarlamada.
Osyǵan deıin habarlaǵanymyzdaı, SQO-da prokýratýra 6,5 myńnan astam qyzmetkerdiń memlekettik bazada tirkelmegenin anyqtady.
