Abaı oblysynda polıtsııa iri órttiń aldyn aldy: júk kóligi janyp kete jazdady

SEMEI. KAZINFORM — Abaı oblysy Kókpekti aýdanynyń aýmaǵynda tártip saqshylary jol boıynda qozǵalyp bara jatqan kómir tıelgen júk kóliginiń artqy jaǵynan shyqqan tútindi baıqap, birden áreket etti. Bul týraly Polisia.kz jazdy.

Aldyn ala boljam boıynsha, tejegish kolodkalary qyzyp, janyp ketken. Tútin kólik astynan, janarmaı bagyna jaqyn jerden shyqqan. 

Bul – órttiń órshýine jáne iri apatqa sebep bolýy múmkin edi. Kólik júrgizýshisin dereý toqtatqan polıtsııa qyzmetkerleri kóliktegi órt sóndirgishti paıdalanyp, órtti sóndirýge kiristi.

Oqıǵa ornynda Kókpekti aýdandyq polıtsııa bóliminiń aǵa krımınalısi, polıtsııa maıory Aıbek Saparov kásibı ári shuǵyl áreket etti. 

Aıta keteıik, júk kóliginde 20 tonna kómir bolǵan. Bir sátke keshigý – aýyr zardaptarǵa ákelýi múmkin edi. Polıtsııa qyzmetkerleriniń jedel ári úılesimdi áreketiniń nátıjesinde órt der kezinde aýyzdyqtalyp, qaıǵyly jaǵdaıdyń joly kesildi. Júk kóliginiń júrgizýshisi polıtsııaǵa alǵysyn bildirdi.

– Kolodkalardyń janyp jatqanyn ózim de baıqamadym. Eger polıtsııa der kezinde toqtatpaǵanda, saldary óte aýyr bolýy múmkin edi, – dedi júrgizýshi.

Eske sala keteıik, buǵan deıin Abaı oblysynda 74 jastaǵy qarııa iz-túzsiz joǵalyp ketkenin jazǵan edik.