Abaı oblysynda polıtsııa dalada máıiti tabylǵan belgili kásipker isine qatysty mán-jaıdy jarııalady
SEMEI. KAZINFORM – Abaı oblysynda bes kúnge sozylǵan izdestirý jumystarynan keıin Semeı qalasyndaǵy janarmaı quıý beketteri jelisiniń ıesi, 44 jastaǵy Rınat Ahmetovtiń máıiti Borodýlıha aýdanynda tabylǵan edi. Tergeýshiler bolǵan oqıǵanyń mán-jaıyn anyqtady.
Bastapqyda izdestirý operatsııasyna arnaıy bólimsheler, áskerı qyzmetshiler men ondaǵan tehnıka jumyldyryldy. Іz-túzsiz joǵalǵan azamattyń óńirge tanymal kásipker bolǵanyn eskergen polıtseıler qylmys bolýy múmkin degen nusqany da joqqa shyǵarmady. Atap aıtqanda, ony urlap áketý nemese tapsyryspen óltirý yqtımaldyǵy qarastyrylǵan.
Alaıda tergeý amaldary men oqıǵa ornyn tekserý barysynda qylmys bolýy múmkin degen nusqa tolyqtaı rastalmady. Jedel qyzmetkerlerdiń anyqtaýynsha, qaıǵyly jaǵdaıǵa birqatar kezdeısoq jaıt sebep bolǵan. Oqıǵa kólik óte sırek júretin, aptasyna bir ret qana adam aıaǵy basatyn ıen daladaǵy qara jolda bastalǵan. Kásipkerdiń kóligi joldan shyǵyp, orǵa túsip ketken. Júrgizýshi kóligin qar men laıǵa batqan jerden óz kúshimen shyǵara almaǵan.
Jaǵdaıdy uıaly telefon qýatynyń taýsylýy odan ári qıyndata tústi. Osylaısha er adam elsiz jerde baılanyssyz qalǵan. Jolaı kólik toqtatýdan nátıje shyqpaǵan soń, ol jaqyn mańdaǵy eldi mekenge jaıaý jetýge bel býǵan. Alaıda eldi mekenge deıin ashyq dala arqyly shamamen 35 shaqyrym jol júrý kerek bolǵan.
– Joǵalǵan azamattyń belgili kásipker bolǵanyn eskerip, alǵashqy kúnderden bastap onyń joǵalýyna qylmystyq árekettiń qatysy bolýy múmkin degen boljamdy joqqa shyǵarmadyq. Sondyqtan izdestirý jumystaryna jeke quram men tehnıkany barynsha jumyldyrdyq. Biraq tergeý barysynda bul oqıǵanyń qylmysqa qatysy joq ekeni anyqtaldy. Er adam qatty tońyp, denesi úsip ketý saldarynan kóz jumǵan. Qatty úsý kezinde adam boıyn jalǵan jylý sezimi bılep, ústindegi kıimderin sheshe bastaıdy. Іzdestirýshilerdiń kásipkerdiń qýaty taýsylǵan telefony men kıimderiniń bir bóligin máıiti tabylǵan jerden edáýir qashyqtyqtan anyqtaýy osy jaǵdaımen túsindiriledi, – dep habarlady Abaı oblystyq polıtsııa departamentinen.
Eske salsaq, buǵan deıin Semeıde joǵalyp ketken er adamnyń máıiti tabylǵany habarlanǵan.