Abaı oblysynda polıtsııa 8 ret ereje buzǵan kortej júrgizýshilerin ustady
ASTANA. KAZINFORM — Abaı oblysynda polıtsııa qyzmetkerleri áleýmettik jelilerge monıtorıng júrgizý barysynda Aqsýat aýdanyndaǵy toı kortejine qatysqan kólikterdiń jol qozǵalysy erejelerin óreskel buzǵanyn anyqtady.
Polıtsııanyń habarlaýynsha, Aqsýat aýdanynyń Qabanbaı kóshesinde Toyota jáne Hyundai Tucson eki avtokóliktiń júrgizýshileri qos tutas jolaq syzyǵyn kesip ótip, qarsy baǵytqa shyqqan.
— Sonymen qatar vıdeoda qozǵalystaǵy kóliktiń esigine jolaýshynyń otyryp alǵany anyq kórinedi. Mundaı áreketter jol qozǵalysyna qatysýshylardyń ómiri men densaýlyǵyna tikeleı qaýip tóndiredi, — dep habarlady vedomstvo.
Polıtseıler quqyq buzýshylyqqa qatysy bar barlyq tulǵany anyqtap, zańnamaǵa sáıkes shara qabyldady. Nátıjesinde eki júrgizýshige qatysty manevr jasaý qaǵıdalaryn buzý, qaýipsizdik beldigin taqpaý, avarııalyq jaǵdaı týǵyzý jáne kólik quraldaryn paıdalaný talaptaryn saqtamaý boıynsha barlyǵy 8 ákimshilik hattama toltyryldy.
Kólik quraldary arnaıy turaqqa qoıyldy. Sonymen qatar jolaýshylardy tasymaldaý, qaýipsizdik beldikterin nemese motoshlemderdi paıdalaný talaptaryn saqtamaǵan jolaýshy da ákimshilik jaýapkershilikke tartyldy.
Eske salaıyq, buǵan deıin Túrkistan oblysynda jol erejesin buzǵan toı kortejiniń júrgizýshileri jazalanǵanyn habarlaǵanbyz.
