Abaı oblysynda polıtsııa 13 jastaǵy jasóspirimdi izdestirip jatyr

SEMEI. KAZINFORM – 10 sáýirge qaraǵan túni Makanchı aýylynyń turǵyny joǵalyp ketkeni týraly habarlama tústi.

Makanchı aýdandyq polıtsııa bólimine jasóspirimniń ákesi júginip, 2011 jyly týǵan, kámeletke tolmaǵan uly Qaısar Qaıratuly joǵalyp ketkeni týraly aıtqan.

Ákesiniń aıtýynsha, 9 sáýir kúni saǵat 14:30 shamasynda uly jasyl tústi elektrli samokatpen úıinen shyǵyp, erkin kúres sektsııasyna qatysý úshin sport modýlge bet alǵan. Sol ýaqyttan beri qaıda júrgeni belgisiz.

Jasóspirimdi izdestirý jumystary birden bastaldy. Makanchı aýdandyq polıtsııa bóliminiń jeke quramy jumyldyrylyp, izdeý toptary quryldy. Іzdeý jumystaryna muǵalimder, aýyl turǵyndary men ákimdik ókilderi de qatysyp jatyr.

- Eger Qaıratuly Qaısardyń júrgen jeri týraly qandaı da bir aqparatyńyz bolsa, «102» nómirine nemese jaqyn mańdaǵy polıtsııa bólimine habarlaýyńyzdy suraımyz, - delingen Abaı oblysy PD habarlamasynda.

Aıt keteıik, Atyraýda byltyrǵy qazanda joǵalǵan boıjetkendi Jaıyqtan izdeý qaıta jalǵasty.