Abaı oblysynda polıtseıler jol ústinde ınsýlt alǵan júrgizýshini qutqardy
SEMEI. KAZINFORM — Abaı oblysynyń jol-patrýldik polıtsııa qyzmetkerleri Semeı–Pavlodar tasjolynda túzý júrmeı, shaıqala qozǵalǵan júk kóligin toqtatty. Júrgizý polıtseılerge ózin jaısyz sezinip turǵanyn aıtyp úlgerip, artynsha esinen tanyp qalǵan, dep habarlaıdy Abaı oblysynyń polıtsııa departamenti.
Oqıǵa 4 qarasha kúni saǵat 19:00 shamasynda Semeı – Pavlodar tas jolynda bolǵan.
Polıtsııa kapıtany Balǵabaev Azamat, polıtsııa kapıtany Qojagulov Jaqsylyq jáne polıtsııa aǵa leıtenanty Sarbasov Jasulannan quralǵan ekıpaj júrgizýshiniń kólikti basqarýda qınalyp kele jatqanyn ańǵaryp, birden toqtatýdy sheshedi.
Júrgizýshi jol jıegine toqtap, kabınadan shyǵyp, ózin jaısyz sezinip turǵanyn aıtqan. Birneshe sekýndtan keıin ol esinen tanyp qalady. Polıtseıler dereý júrek-ókpe reanımatsııasyn bastap, júrgizýshiniń júrek soǵysyn qalpyna keltire aldy. Ár sekýndtyń mańyzyn túsingen patrýldik qyzmetkerler jedel járdemdi oqıǵa ornynda kútpeı, naýqasty shuǵyl túrde Semeı qalasyna alyp ketedi.
«Qala shekarasyna jetkende olar jedel járdem brıgadasymen kezdesip, zardap shekken azamatty medıtsına qyzmetkerlerine tabystady. Dárigerler keıin onyń ınsýlt alǵanyn rastady. Patrýldik polıtseılerdiń jedeldigi, kásibı áreketi jáne adam ómirine degen janashyrlyǵy aýyr jaǵdaıdyń qaıǵyly aıaqtalýyna jol bermeı, júrgizýshiniń ómirin saqtap qalýǵa múmkindik berdi», delingen polıtsııa departmentiniń habarlamasynda.
Eske sala ketsek, buǵan deıin Aqtóbede polıtsııa qyzmetkerleri kúıeýine qoshtasý hatyn jazǵan áıeldi qutqardy.