Abaı oblysynda polıtseıler qatty qansyraǵan balany qutqaryp qaldy
ASTANA. KAZINFORM — Abaı oblysynda polıtseıler aýyr jaraqat alǵan bes jasar balany nebári 12 mınýt ishinde oblystyq aýrýhanaǵa jetkizdi.
Oqıǵa 15 tamyzda Semeı — Óskemen avtojolynda bolǵan. Volkswagen kóliginiń júrgizýshisi patrýldik polıtsııa qyzmetkerlerine toqtap, salonda otyrǵan bes jasar balanyń aıaǵynan tereń jaraqat alyp, qatty qansyrap jatqanyn aıtqan.
Balanyń anasynyń sózinshe, Jańasemeı aýdanyna qarasty Granıtnyı aýylynda turatyn uly aýlada oınap júrip, úıge kirmek bolǵan. Sol sátte kireberis esiktiń shynysy synyp, balanyń aıaǵyn qatty jaraqattaǵan.
Balanyń jaǵdaıynyń aýyr ekenin túsingen polıtsııa qyzmetkerleri Elaman Masalımov pen Medet Smaǵulov ýaqyt joǵaltpaı, anasy men balany patrýldik kólikke otyrǵyzyp, oblystyq aýrýhanaǵa qaraı jolǵa shyqqan.
Polıtseıler jaraqat alǵan balany 12 mınýt ishinde oblystyq aýrýhananyń balalardy qabyldaý bólimine jetkizgen. Dárigerler balany birden qabyldap, shuǵyl túrde operatsııa jasaǵan.
— Balamnyń aıaǵynan qan toqtamaı, qatty qorqyp kettim. Ne isterimdi bilmeı, jolda polıtseılerdi kórip, kómek suradym. Olar birden bizge kómektesip, balamdy kólikke otyrǵyzdy. Bar bolǵany 12 mınýttyń ishinde aýrýhanaǵa jetkizdi. Men úshin sol sátte bul — úlken kómek boldy. Polıtseılerge shyn júrekten alǵys aıtamyn, — dedi balanyń anasy.
Eske salaıyq, buǵan deıin Qaraǵandyda polıtsııa qyzmetkeri órtenip jatqan páterge kirip, 5 balany qutqaryp qalǵanyn jazǵanbyz.
