Abaı oblysynda polıtseıler borandy kúni 150 kólikti súıemeldedi
ASTANA. KAZINFORM — 5 aqpan kúni Kalbataý aýyly men Aıagóz qalasyn baılanystyratyn respýblıkalyq mańyzy bar avtojolda aýqymdy profılaktıkalyq is-shara uıymdastyryldy, dep habarlaıdy oblystyq PD baspasóz qyzmeti.
Keshki saǵat 17:00–de polıtsııa qyzmetkerleri birjolǵy ótkizý tártibimen 150 jeńil avtokólikten quralǵan kolonnany qaýipsiz túrde súıemeldeýdi qamtamasyz etti.
Іs-sharanyń negizgi maqsaty — jol-kólik oqıǵalarynyń aldyn alý, qozǵalysty retteý jáne azamattardyń ómiri men densaýlyǵyn qorǵaý. Qysqy kezeńdegi kúrdeli jol jaǵdaıyn eskere otyryp, polıtsııa qyzmetkerleri jol boıyndaǵy tártipti qatań baqylaýda ustap, qozǵalystyń úzdiksiz ári qaýipsiz ótýine jaǵdaı jasady. Súıemeldeý barysynda barlyq qaýipsizdik talaptary saqtalyp, arnaıy tehnıka men qyzmettik kólikter jumyldyryldy. Kolonna belgilengen tártipke saı qozǵalyp, júrgizýshilerge qajetti nusqaýlar berildi. Nátıjesinde kólikter marshrýt boıymen kedergisiz ótip, jol-kólik oqıǵalaryna jol berilgen joq.
Abaı oblysy PD Ákimshilik polıtsııa basqarmasynyń bastyǵy polıtsııa polkovnıgi Baýyrjan Omarov qys mezgilindegi jol qaýipsizdigi týraly eske saldy.
— Qys mezgili — jol qozǵalysyna qatysýshylar úshin eń qaýipti kezeńderdiń biri. Sondyqtan polıtsııa qyzmetkerleri aýa raıynyń qolaısyzdyǵyna qaramastan, azamattardyń qaýipsizdigin qamtamasyz etý úshin táýlik boıy qyzmet atqaryp keledi. Kólikterdi súıemeldeý — jol-kólik oqıǵalarynyń aldyn alý men azamattardyń qaýipsizdigin saqtaýdyń tıimdi tásilderiniń biri. Júrgizýshilerden jolda muqııat bolyp, polıtsııa qyzmetkerleriniń talaptaryn qatań saqtaýdy suraımyz, — dedi ol.
Osydan buryn Abaı oblysynda 50 jolaýshy mingen avtobýs aýdarylyp qalǵanyn jazǵanbyz.